ავარია ბათუმში, რომელსაც მოტოციკლისტი ემსხვერპლა – სასამართლოს განაჩენი


ბათუმის საქალაქო სასამართლომ დაასრულა ერთ-ერთი ავარიის შემთხვევაზე საქმის განხილვა, როცა ავტოსაგზაო შემთხვევის შედეგად ადამიანი დაიღუპა. მოსამართლე თამარ ბეჟანიშვილმა 4 წლით და 6 თვით თავისუფლების აღკვეთა მიუსაჯა კახა ფ.-ს, თუმცა ეს სასჯელი პირობით ჩაეთვალა და გამოსაცდელი ვადა დაენიშნა იმავე ვადით.

საუბარია გასული წლის 17 დეკემბერს ბათუმში, ხიმშიაშვილის ქუჩაზე მომხდარ ავარიაზე – მსუბუქი ავტომანქანა მოტოციკლს შეეჯახა. ავარიის შედეგად მოტოციკლის მძღოლი ადგილზე გარდაიცვალა.

ავარიის შედეგად გამოძიება სისხლის სამართლის კოდექსის 276-ე მუხლის მე-5 ნაწილის მიხედვით დაიწყო, რაც 4-დან 6-წლამდე თავისუფლების აღკვეთას ითვალისწინებს. ბრალდებულმა პროკურატურის მიერ წარდგენილი ბრალი აღიარა და დაზარალებულის უფლებამონაცვლეს შეურიგდა.

„იმის გათვალისწინებით, რომ ბრალდებული აღიარებს და ინანიებს ჩადენილს, არ არის ნასამართლევი, სახეზეა გაუფრთხილებლობითი დანაშაული,“ – აღნიშნულია განაჩენში.

განაჩენის მიხედვით, მსჯავრდებულს ასევე ერთი წლით ჩამოერთვა სატრანსპორტო საშუალების მართვის უფლება.

ამ თემაზე:

ექვს თვეში საქართველოში 224 ადამიანი დაიღუპა ავარიის შედეგად

ნეტგაზეთის მასალების სხვა გამოცემებში გადაბეჭდვის წესი
ავტორი