Batumelebi | აჭარის უსინათლოთა კავშირის თავმჯდომარის არჩევნები ჩაიშალა, 1 პირი პოლიციაში გადაიყვანეს აჭარის უსინათლოთა კავშირის თავმჯდომარის არჩევნები ჩაიშალა, 1 პირი პოლიციაში გადაიყვანეს – Batumelebi
RU | GE  

აჭარის უსინათლოთა კავშირის თავმჯდომარის არჩევნები ჩაიშალა, 1 პირი პოლიციაში გადაიყვანეს

დღეს, 16 ოქტომბერს, ბათუმში, საქართველოს უსინათლოთა კავშირის აჭარის ფილიალის თავმჯდომარის რიგგარეშე არჩევნებზე დაპირისპირება მოხდა, შედეგად საერთო კრება ჩაიშალა, კავშირის თავმჯდომარეობის ერთ-ერთი კანდიდატი, ალექს წეველიძე კი პოლიციამ განყოფილებაში გადაიყვანა გამოსაკითხად.

წეველიძის პოლიციის განყოფილებაში გადაყვანას წინ უძღოდა ორსაათიანი დაპირისპირება საერთო კრებაზე. ალექს წეველიძე ასევე უსინათლოთა კავშირის აჭარის  ფილიალის თავმჯდომარეობის ერთ-ერთი კანდიდატია. ის და საერთო კრების ზოგიერთი მონაწილე არჩევნების სამი თვით გადადებას ითხოვდა, რადგან, მათი თქმით, ამ დროის განმავლობაში კანდიდატებს ექნებათ შესაძლებლობა,  კავშირის წევრებს თავიანთი პროგრამა გააცნონ.

“ჩაიშალა კრება იმიტომ რომ აქ არ იყო არცერთი უსინათლოს უფლება დაცული. არ გაკეთდა გადასატანი ყუთი, არ მიეცა კანდიდატებს  სრული წვდომა ამომრჩეველზე. აქ მოიყვანეს 117 “ნაყიდი ცეხავიკი” და არ მოიყვანეს უსინათლოები. არ გააგებინეს. ვითხოვთ არჩევნები გადაიდოს სამი თვით, აიღოს სამთვიანი ტაიმ-აუტი ორგანიზაციამ. საარჩევნო პროცესში ჩაერთოს არასამთავრობო სექტორი. დაიბეჭდოს ბიულეტენები, არჩევნების ჩატარებამდე ერთი დღით ადრე და დაიდოს ნეიტრალურ ადგილას, ყველა კანდიდატს მიეცეს თავისი წარმომადგენელი დასვას კომისიაში. ასევე მნიშვნელოვანია გაკეთდეს გადასატანი ყუთი,  ოცამდე უსინათლოა, რომელსაც არ შეუძლია გადაადგილება და არ უნდა დაირღვეს მათი უფლებები. თუ ყველაფერი ასე გაკეთდება, მოგებულ კანდიდატს ხელს ჩამოვართმევ და მივულოცავ თავმჯდომარეობას,” – უთხრა “ბათუმელებს” ალექს წეველიძემ.

ალექს წეველიძე

წეველიძის მოთხოვნას არ ეთანხმება საქართველოს  უსინათლოთა  კავშირის ხელმძღვანელი რეზო მაისურაძე და საერთო კრებაზე მისული  უსინათლოთა ნაწილი.

“რეალობაში ეს არის კერძო სამართლის სუბიექტის “უსინათლოთა კავშირის აჭარის ფილიალის საერთო კრება. საერთო კრებაზე სამოქალაქო კოდექსის პუნქტებიდან გამომდინარე არ მოქმედებს საჯარო სამართლის არჩევნების პრინციპები ანუ აქ არ არსებობს გადასატანი ყუთები, არ არსებობს საარჩევნო უბნების გახსნა და დახურვა, წინასწარ დამტკიცებული კომისია და ა.შ. ყველა პროცედურა გადის კრებაზე. ჩვენი წესდების თანახმად კრება ტარდება კრებიის მონაწილეებით. ვინც მოდის. თუმცა წევრებს ყველას პატივს ვცემთ და დახმარებებს სახლში ვუგზავნით, მაგრამ კრებაზე ვისაც შეუძლია მოსვლა, მხოლოდ ის ატარებს,” – უთხრა “ბათუმელებს” საქართველოს უსინათლოთა კავშირის ხელმძღვანელმა რეზო მაისურაძემ.

საქართველოს უსინათლოთა კავშირის ხელმთძვანელი რეზო მაისურაძე

დაძაბულობის განსამუხტავად ადგილზე გამოიძახეს საპატრულო პოლიცია. სწორედ პოლიციის მოსვლის შემდეგ დაიწყეს უსინათლოთა კავშირის  წევრებმა საერთო  კრების დატოვება.

“ბათუმელებმა”  საქართველოს უსინათლოთა კავშირის ხელმძღვანელს, რეზო მაისურაძეს ჰკითხა, იყო თუ არა შესაძლებელი დღეს, 16 ოქტომბერს საერთო კრების განახლება და ახალი თავმჯდომარის არჩევა.

“ჯერჯერობით, არ ვიცით. სავარაუდოდ ჩაიშლება და შედგება ოქმი, თუ რა  მიზეზით ჩაიშალა,”- უთხრა “ბათუმელებს” რეზო მაისურაძემ.

უსინათლოთა კავშირის აჭარის ფილიალის თავმჯდომარეობის კანდიდატები არიან: გივი ნინიძე, ზურაბ მსახურაძე, ალექს წეველიძე, ბადრი კონცელიძე, ზაურ კახიძე, არჩილ ვაშაყმაძე და ოთარ ძირკვაძე.

არჩევნები უსინათლოთა კავშირის გამგეობის მიერ მას შემდეგ დაინიშნა, რაც ყოფილი თავმჯდომარე, ზაურ დევაძე გარდაიცვალა.

_____________

ფოტოზე: აჭარის უსინათლოთა კავშირის თავმჯდომარის არჩევნები. ფოტო: მანანა ქველიაშვილი/ბათუმელები

 

ნეტგაზეთის მასალების სხვა გამოცემებში გადაბეჭდვის წესი
ავტორი