ქართველი სპეციალისტები ამერიკელ ექსპერტებთან ერთად სწავლობენ გარემოს, სადაც ის ბავშვები ცხოვრობენ, რომლებსაც, 2018 წელს, გაეროს ბავშვთა ფონდის მიერ ჩატარებული კვლევის თანახმად, სისხლში ტყვიის გადაჭარბებული შემცველობა დაუფიქსირდათ. სპეციალისტები სწავლობენ ნივთებს, საღებავებს, ნიადაგს, წყალს და ყველაფერს, რასაც საცხოვრებელი გარემო მოიცავს. სინჯები აიღეს აჭარის მაღალმთიანეთშიც.
გარდა ამისა, კვლევები ჩაუტარდათ პირველი კვლევის მონაწილე ბავშვების ოჯახის წევრ სხვა ბავშვებს და განმეორებითი სინჯები აუღეს თავად იმ ბავშვებსაც, რომლებსაც სისხლში ტყვიის მაღალი შემცველობა უკვე დაუფიქსირდათ.
საცხოვრებელი გარემოს კვლევას სახელმწიფო პროგრამის ფარგლებში საქართველოს სოფლის მეურნეობისა და გარემოს დაცვის სამინისტრო საერთაშორისო ექსპერტების ჩართულობით ახორციელებს, ბავშვებზე ხელახალი სინჯების აღება კი დაავადებათა კონტროლის ცენტრის ჩართულობით ხორციელდება.
აჭარის ჯანდაცვის მინისტრის მოადგილის, ნინო ნიჟარაძის ინფორმაციით, გაეროს ბავშვთა ფონდის [UNISEF] მხარდაჭერით ჩატარებული კვლევის შედეგების საფუძველზე, ამოქმედდა სახელმწიფო პროგრამა, რაც „კვლევის მონაწილეების ოჯახის წევრი ბავშვების ტყვიის შემცველობაზე კვლევას და ტყვიის მაღალი შემცველობის მქონე ბავშვთა ჯანმრთელობის მდგომარეობის სრულყოფილ შეფასებას მოიცავს.“
კვლევის შედეგები 2019 წლის ბოლოს უნდა გახდეს ცნობილი. წინასწარი ინფორმაციით კი, რაც ნინო ნიჟარაძემაც დაგვიდასტურა, იმ ბავშვებში, რომლებსაც განმეორებითი კვლევა ჩაუტარადათ, ზოგიერთს შემცირებული ჰქონდა სისხლში ტყვიის შემცველობა, რამდენიმეს კი, უკვე ნორმაში ჰქონდა. კითხვაზე, რას შეიძლებოდა გამოეწვია ეს ცვლილება, აჭარის ჯანდაცვის მინისტრის მოადგილემ განგვიმარტა, რომ მონაცემების შემცირება სავარაუდოდ ჰიგიენური წესების გაუმჯობესებითაა გამოწვეული:
„გარდა ამისა, პირველადი რეკომენდაციის სახით ბავშვებისთვის დაიგეგმა სრულყოფილი კვების ხელშეწყობა, რა მიზნითაც აჭარის ჯანმრთელობისა და სოციალური დაცვის სამინისტროს პროგრამის ფარგლებში მათ [100 ათას ქულამდე ოჯახებს] ყოველთვიურად ეძლევათ ასლარიანი კვების ვაუჩერი. რეკომენდაცია მოიცავს პოლივიტამინებისა და მინერალების დანამატების სახით მიღებას.“
სოფლის მეურნეობისა და გარემოს დაცვის სამინისტროში, ასევე, დაავადებათა კონტროლის ცენტრში მიმდინარე კვლევებზე საუბარი იმ მიზეზით არ ისურვეს, რომ დაახლოებით ერთ კვირაში, 21 ოქტომბრიდან, იგეგმება ე.წ. ტყვიის კვირეული, სადაც სურთ ყველა იმ ინფორმაციის გაჟღერება, რასაც სახელმწიფო ამ მიმართულებით გეგმავს.
„ბათუმელების“ ინფორმაციით, შესაბამისი სამთავრობო სტრუქტურები მონაცემების შემცირების მიზნით გრძელვადიანი სტრატეგიის შემუშავების საკითხს განიხილავენ. გარდა ამისა, განიხილება კიდევ ერთი სკრინინგის ჩატარების საკითხიც და მთავრობა მსჯელობს, სად, რა ასაკობრივ ჯგუფში ჩაატაროს ტყვიაზე სკრინინგი ბავშვებში.
ნინო ნიჟარაძის ინფორმაციით, „მსჯელობა მიდის იმაზე, გამოყონ რაიმე პათოლოგიის მქონე ბავშვები თუ არა. უფრო პათოლოგიის მქონე ბავშვების კვლევისკენ იხრებიან. ამ ეტაპზე რაც მოქმედებს, არის მხოლოდ დაზარალებულ ოჯახებში გარემოს შესწავლის საკითხი“.
საქართველოში ბავშვების სისხლში ტყვიის შემცველობის დასადგენად მასშტაბური კვლევა გაეროს ბავშვთა ფონდის [Unicef] დახმარებით 2018 წელს ჩატარდა. ამ კვლევის მიხედვით, სისხლში ტყვიის შემცველობის მომატება ბავშვების 41%-ში დაფიქსირდა.
კვლევამ აჩვენა, რომ საქართველოში ბავშვების 25%-ის სისხლში ტყვიის შემცველობა მერყეობს 5-10 მკგ/დლ-ის (მიკროგრამი დეცილიტრზე) ფარგლებში, რაც მიუთითებს მსუბუქ მატებაზე, ხოლო ბავშვების 16%-ის სისხლში ტყვიის შემცველობა ტოლია ან აღემატება 10 მკგ/დლ-ს.
ბავშვების სისხლში ტყვიის შემცველობის მონაცემები საქართველოს რეგიონების მიხედვით განსხვავდება და ამ კუთხით ყველაზე ცუდი მდგომარეობა აჭარაშია, შემდეგ მოდის გურია.
გაეროს ბავშვთა ფონდის კვლევის ფარგლებში სისხლში ტყვიის შემცველობაზე აჭარაში კვლევა ჩაუტარდა 164 ბავშვს. კვლევის შედეგებმა აჩვენა, რომ კვლევაში მონაწილე ბავშვების 85 პროცენტს ანუ 139 ბავშვს სისხლში დადგენილ ნორმაზე მეტი [5 მკგ/დლ. მიკროგრამი დეცილიტრზე] ტყვიის შემცველობა აღმოაჩნდა, ხოლო 50 პროცენტს 10 მკგ/დლ-ი. როგორც გაეროს ბავშვთა ფონდშიც განმარტეს, გამოკვლეული ბავშვებიდან, ვისაც სისხლში ტყვიის მაღალი შემცველობა აღმოაჩნდა, უმეტესობა სოფელში ცხოვრობს.
ტყვიით ინტოქსიკაციის შესაძლო გზებია: საღებავი, რომელიც შეიცავს ტყვიას; სახლის მტვერი ან ნიადაგი, რომელიც შეიცავს ტყვიას; ტყვიის შემცველი სამშენებლო მასალა; დაბინძურებული გარემო, საოჯახო მტვერი; ტკბილეული/სანელებლები, თუ მასში გამოყენებულ საღებავში მაღალია ტყვიის შემცველობა; სათამაშოები, პარფიუმერია, რომლებიც შეიცავენ სხვადასხვა საღებავ ელემენტებს; ტყვიის შემცველი წყლის მილები და საწვავი.
