ჩრდილოეთ სირიაში თურქეთის შეიარაღებული ძალების სამხედრო ოპერაცია გრძელდება. თურქეთის თავდაცვის მინისტრ ჰულუსი აქარის განცხადებით, უკვე „342 ტერორისტია განეიტრალებული“. „ოპერაცია გრძელდება წარმატებით, როგორც იყო დაგეგმილი,“ – აცხადებს აქარი.
თურქეთის თავდაცვის მინისტრის მტკიცებით, მათი სამიზნე მხოლოდ „ტერორისტები, მათი თავშესაფრები, პოზიციები, საბრძოლო მასალები და მოწყობილობებია“.
„ჩვენ ვცდილობთ, ზიანი არ მივაყენოთ ისტორიულ, კულტურულ, რელიგიურ ადგილებს. სამოქალაქო, უდანაშაულო ადამიანების საცხოვრებლებს, ასევე, მეგობარი, მოკავშირე ქვეყნების ნაწილებს, რომელიც შეიძლება იყოს წარმოდგენილი რეგიონში,“ – ჰულუსი აქარის ამ კომენტარს თურქული პროსამთავრობო გამოცემა Daily Sabah-ი ავრცელებს.
თურქეთის საზოგადოებრივი მაუწყებელი კი ავრცელებს ინფორმაციას სამხედრო ოპერაციის დროს დაღუპული 1 თურქი ჯარისკაცის შესახებ.
„ეროვნული თავდაცვის სამინისტროს განცხადებით, ტერორისტული ორგანიზაცია PKK/PYD-ს წევრებთან შეტაკების დროს ერთი სამხედრო დაიღუპა,“ – წერს TRT თურქეთის საზოგადოებრივი მაუწყებელი.
თურქეთმა სამხედრო ოპერაცია „მშვიდობის გაზაფხული“ ჩრდილოეთ სირიაში, მდინარე ევფრატის აღმოსავლეთით 9 ოქტომბერს დაიწყო.
„თურქეთის შეიარაღებული ძალების ოპერაცია YPG/ PKK-ს წინააღმდეგ, თურქეთის სასაზღვრო პოზიციებთან მათ კონტაქტს შეწყვეტს და ამით მოიხსნება პოტენციური საფრთხე,“ – ასე ხსნის თურქეთი სამხედრო ოპერაციის – „მშვიდობის გაზაფხულის“ დაწყებას ჩრდილოეთ სირიაში.
ამავე თემაზე: რისთვის იბრძვიან ჩრდილოეთ სირიაში
ვინ არიან ქურთები?
მთავარი ფოტო: თურქული მედია
