ნობელის პრიზი ლიტერატურაში პოლონელმა და ავსტრიელმა მწერლებმა მიიღეს


ლიტერატურის დარგში ნობელიანტების ვინაობა ცნობილია. ნობელის პრიზის 2018 წლის მფლობელი პოლონელი ავტორი ოლგა ტოკარჩუკი გახდა,  2019 წლის პრიზის მფლობელი კი ავსტრიელი ავტორი – პიტერ ჰანდკე.

ოლგა ტოკარჩუკის შესახებ ნობელის კომიტეტი წერს, რომ  მას პრიზი გადასცეს “წარმოსახვითი ნარატივისთვის, რომელიც ენციკლოპედიური ვნებით წარმოგვიდგენს საზღვრების გადაკვეთას – როგორც ცხოვრების წესს “.

რაც შეეხება პიტერ ჰანდკეს, მას ნობელი გადაეცა “გავლენიანი შრომებისთვის, რომელშიც ლინგვისტური მიგნებებით შეისწავლა ადამიანური გამოცდილების სპეციფიკა და პერიფერიები”.

2018 წელს ნობელის პრემია არ გაიცა, რადგან ნობელის პრემიის აკადემია სექსუალურ და ფინანსურ სკანდალში გაეხვა.  სკანდალის შემდეგ აკადემიის ექვსმა წევრმა თანამდებობა დატოვა. სკანდალის მიზეზი ფოტოგრაფი და რეჟისორი ჟან კლოდ არნო გახდა. არნო შვედი პოეტის, კატარინა ფრონტენსონის მეუღლეა და ის პრესტიჟული პრემიის აკადემიის წევრად 1992 წელს აირჩიეს. 2017 წლის ნოემბერში ჟან-კლოდ არნო სექსუალურ ძალადობაში 18-მა ქალმა დაადანაშაულა. ძალადობის ადგილად მსხვერპლი ქალები ნობელის აკადემიის დაწესებულებებს ასახელებენ.

პრესტიჟული აკადემიის წევრის მეუღლესთან დაკავშირებული სექსუალური სკანდალის შემდეგ ნობელის კომიტეტმა მალევე მიიღო კატარინა ფრონტენსონის აკადემიიდან გარიცხვის გადაწყვეტილება.

ნეტგაზეთის მასალების სხვა გამოცემებში გადაბეჭდვის წესი
ავტორი