Batumelebi | სექსუალური შევიწროებისა და დისკრიმინაციის საკითხებზე ბათუმში შეხვედრა გაიმართება სექსუალური შევიწროებისა და დისკრიმინაციის საკითხებზე ბათუმში შეხვედრა გაიმართება – Batumelebi
RU | GE  

სექსუალური შევიწროებისა და დისკრიმინაციის საკითხებზე ბათუმში შეხვედრა გაიმართება

25 სექტემბერს, 13:00 საათზე, „დემოკრატიული ჩართულობის ცენტრების ქსელის“ ბათუმის ოფისში, სექსუალური შევიწროებისა და დისკრიმინაციის საკითხებზე შეხვედრა გაიმართება. დისკუსიას გაუძღვებიან საქართველოს პარლამენტის, შსს-ს და სახალხო დამცველის აპარატის წარმომადგენლები.

მომხსენებლები იქნებიან საქართველოს პარლამენტის წევრი: ნინო წილოსანი, საქართველოს სახალხო დამცველის აპარატის, თანასწორობის დეპარტამენტის იურისტი – დიანა დავითაძე, საქართველოს შინაგან საქმეთა სამინისტროს ადამიანის უფლებათა დაცვისა და გამოძიების ხარისხის მონიტორინგის დეპარტამენტის, ადამიანის უფლებათა დაცვის სამმართველოს განსაკუთრებით მნიშვნელოვან საქმეთა ინსპექტორი – ნატი გელოვანი.

შეხვედრის პირველი ნაწილი დაეთმობა პრეზენტაციებს, ხოლო მეორე ნაწილი განკუთვნილი იქნება კითხვა-პასუხისთვის.

საქართველოს პარლამენტის წევრის პრეზენტაცია შეეხება განხორციელებულ საკანონმდებლო ცვლილებებს, სექსუალური შევიწროების დეფინიციის გაჩენას საკანონმდებლო დონეზე და მანამდე არსებულ მდგომარეობას.

შსს-ს წარმომადგენელი განიხილავს სექსუალური შევიწროების სამართალდარღვევის შემადგენელ ყველა ელემენტს, ისაუბრებს ადმინისტრაციულ სამართალდარღვევის ოქმის გამოცემის პროცედურაზე, სასამართლო განხილვის პროცედურასა და არსებულ პრაქტიკაზე.

სახალხო დამცველის აპარატის წარმომადგენელი ისაუბრებს შემდეგ საკითხებზე: სახალხო დამცველის მანდატი, „დისკრიმინაციის ყველა ფორმის აღმოფხვრის შესახებ“ საქართველოს კანონის შესაბამისად რა უფლებამოსილებები აქვს სახალხო დამცველს, როგორ ხდება დისკრიმინაციის თაობაზე განცხადებების შესწავლა და ბოლოს შრომით ურთიერთობებში დისკრიმინაციის შემთხვევებს განიხილავს პრაქტიკული მაგალითების გამოყენებით.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.