დუმბაძის 12-ში კაფეების – ვინილისა და k2-ის ადგილზე მშენებლობა იგეგმება


შპს „ახალი ერა“ ბათუმში, დუმბაძის ქუჩაზე, ადრე შეთანხმებული 8-სართულიანის ნაცვლად, 5-სართულიანი სახლის აშენებას გეგმავს. ტერიტორია ძეგლის დაცვის ზონაშია. დუმბაძის #12-24 -ა-ს გვერდით კულტურული მემკვიდრეობის ძეგლის სტატუსის მქონე ყოფილი პირველი აფთიაქის სამსართულიანი შენობა დგას, რომელიც XIX-XX საუკუნეების მიჯნაზეა აგებული. სამშენებლოდ გამიზნული ტერიტორიის მოპირდაპირე მხარეს კი, ასევე კულტურული მემკვიდრეობის ძეგლის სტატუსის მქონე ერთსართულიანი სახლია განთავსებული, სადაც ადრე ბელგიის საკონსულო იყო.

ამ ქუჩაზე მეტ-ნაკლებად შენარჩუნებულია ძველი განაშენიანება, სახლების უმეტესობა ორსართულიანია. 2017 წელს კომპანიამ ამ ქუჩაზე რვასართულიანი სახლის მშენებლობა შეათანხმა კულტურული მემკვიდრეობის სააგენტოს ზონალურ საბჭოს. მერიაში კი, კომპანიას კ2 კოეფიციენტის გაზრდაზე აჭარის მთავრობის ყოფილმა თავმჯდომარემ, არჩილ ხაბაძემ უშუამდგომლა. მაშინ ეს საკითხი საზოგადოებაში მწვავე კრიტიკის საგანი გახდა, რის შემდეგაც კომპანიის ერთ-ერთმა მფლობელმა ლევან ხიმშიაშვილმა განაცხადა, რომ საზოგადოებრივი ინტერესის გათვალისწინებით კომპანია პროექტს აჩერებს.

ახლა კომპანია ხუთსართულიანი პროექტის შეთანხმებას ითხოვს. საკითხი აჭარის კულტურული მემკვიდრეობის ზონალურმა საბჭომ 2 სექტემბრის სხდომაზე განიხილა.

ადრე განხილული და ახალი ხუთსართულიანი სახლის პროექტის რენდერი

დუმბაძის ქუჩაზე ახალი მრავალბინიანი სახლის ასაშენებლად კომპანია ორი ერთსართულიანი შენობის დანგრევას აპირებს, მათ შორისაა კაფე ვინილის და კაფე კ2-ის შენობები და ეზო. ტერიტორიის დაზუსტებული ფართობი 952 კვადრატული მეტრია.

დუმბაძის #12

შპს „ახალი ერა“ 2014 წელს დაფუძნებული კომპანიაა. კომპანიის 33 პროცენტს რუსეთის მოქალაქე თამაზ ბექიაია, 34 პროცენტს ბიზნესმენი ჯუმბერ ზოიძე, ხოლო დარჩენილ 33 პროცენტს ლევან ხიმშიაშვილი ფლობენ.

დუმბაძის ქუჩაზე რვასართულიანი სახლის აშენებას არჩილ ხაბაძის მეგობრის კომპანია გეგმავს

ნეტგაზეთის მასალების სხვა გამოცემებში გადაბეჭდვის წესი
ავტორი