ძლიერი წვიმა ბათუმში [ფოტო]

დღეს, 6 სექტემბერს, დაახლოებით საღამოს 7 საათიდან ბათუმში კოკისპირულად წვიმს. ძლიერი ჭვიმის შედეგად, დაიტბორა ქალაქის ქუჩები. რამდენიმე ადგილზე შეფერხებით მოძრაობს ავტოტრანსპორტი.

„ბათუმის წყალში“ ამ დროისთვის [20:15 სთ.] შესულია ზარი 30-მდე მისამართიდან, ეზოებისა და სახლების დატბორვის შესახებ. კომპანიაში „ბათუმელებს“ უთხრეს, რომ ბრიგადები გასულები არიან გამოძახების ადგილებზე. ძირითადად, ზარები კომპანიაში გრიბოედოვის, ლერმონტოვის, გორგილაძის, აღმაშენებლის ქუჩებიდან შევიდა.

აჭარის რეგიონალური ჰიდრომეტეოროლოგიური ობსერვატორიის პროგნოზით ბათუმსა და აჭარის მაღალმთიანეთში შაბათს, 7 სექტემბერს, კვლავ მოსალოდნელია წვიმა, ელვა-ჭექა. კვირას, 8 სექტემბერს კი, საღამოს და ღამის საათებში ზოგან ელვა-ჭექა და წვიმა, ხოლო დღისით, უმეტესად უნალექო ამინდი იქნება.