სიახლეები

ბათუმში მედრესე მომავალ წლამდე არ გაიხსნება

08.11.2015 • 3075
ბათუმში მედრესე მომავალ წლამდე არ გაიხსნება
სამუფთო რეზიდენციის გახსნა

სამუფთო რეზიდენციის გახსნა

დასავლეთ საქართველოს მუფთი, ბეგლარ ქამაშიძე მედრესესა და სწავლების ფორმასთან დაკავშირებით ადრე ამბობდა: „ვიმუშავებ ჯგუფთან ერთად და ყველაფერი შეთანხმდება. ვეცდებით, რომ სექტემბრამდე ეს ყველაფერი მოვასწროთ“.

მუფთმა ამჯერად „ბათუმელებთან“ განაცხადა, რომ მიმდინარე წელს მედრესეს  გახსნა ვერ მოესწრება: „პირველ რიგში აუცილებელია შენობის გარემონტება, შესაბამისად მოწყობა და რამდენად მოვასწრებთ, ვერ გეტყვით… სასწავლებლის გახსნა, ვფიქრობ, მომავალ წლამდე ვერ მოხერხდება. ამასთან, შესაძლოა აქ პანსიონიც გაიხსნას. საბოლოოდ შეჯერებული არ ვართ“.

მუფთი ბეგლარ ქამაშიძე ასევე აცხადებდა, რომ სურთ საქართველოში იყოს  ისლამური თეოლოგიური უნივერსიტეტი და ამაზე მიდის მუშაობა… `მედრესეში კი რელიგიის სწავლების გარდა შეიძლება გვქონდეს ქართული ენისა და ლიტერატურის, ისტორიის, უცხო ენების გაკვეთილები და ა.შ. ის, რაც აქამდე მედრესეების სახელით იყო ცნობილი, რეალურად ესენი მედრესეები არ არის, პანსიონებია, რომლებსაც სამართლებრივად სხვა სტატუსი აქვთ. მედრესე კი, როგორც საჯარო სამართლის იურიდიული პირი, ისე დაიწყებდა ფუნქციონირებას.“

მუფთის განცხადებით, ამ დროისთვის არც ეს საკითხებია საბოლოოდ გადაწყვეტილი და მათზე მუშაობა მიმდინარეობს.

„სრულიად საქართველოს მუსლიმთა სამმართველოს“, როგორც საჯარო სამართლის იურიდიულ პირს, სახელმწიფო ქონება მისი, როგორც იურიდიული პირის არსებობის მანძილზე სარგებლობის უფლებით გადაეცა –  გადაცემული ქონების [შენობებისა და მიწის ნაკვეთის] მოვლა-პატრონობისა და დაცვის პირობით.

ზემოაღნიშნული ქონება საქართველოს მთავრობის მიერ გამოყოფილი თანხით [4 მილიონ 486 ათას 400 ლარი], კერძო მესაკუთრეებისგან აჭარის ფინანსთა და ეკონომიკის სამინისტრომ შეისყიდა.

გადაბეჭდვის წესი


ასევე: