ჩაქვში „წადი გახარია“ ბანერის გამოფენისთვის ზედამხედველობამ აქტივისტები 7-ჯერ დააჯარიმა


ჩაქვში, ბათუმი-ქობულეთის ავტობანზე, აქტივისტების მიერ გამოფენილი ბანერის – „წადი გახარიას“ გამო ქობულეთის მერიის ზედამხედველობის სამსახური აქტივისტებს აჯარიმებს.

„ყოველდღე მოდიან, გვთხოვენ პირადობის მოწმობებს, მაგრამ ჩვენ არ ვაძლევთ. წერენ რაღაც ოქმებს და გვეუბნებიან, რომ ჯარიმები მოგვივა. თუმცა კონკრეტულად ვის სახელზე წერენ ჯარიმას, არ ვიცით“, – ამბობს „ბათუმელებთან“ ერთ-ერთი აქტივისტი, ხათუნა ბერიძე.

მისი თქმით, ზედამხედველობის სამსახური მათ ეუბნება, რომ ბანერის გამოფენით ისინი ქალაქის იერ-სახეს ამახინჯებენ.

„ჩვენ ვიცით, რომ ამის უფლება გვაქვს და კანონს არ ვარღვევთ. ყოველ 6 საათზე მოვდივართ და 1-2 საათით ვკიდებთ ბანერს, შემდეგ ვხსნით და მივდივართ“, – ამბობს ბერიძე.

„ბათუმელები“ ქობულეთის მუნიციპალიტეტის ზედამხედველობის სამსახურის თანამშრომელს, დათო ზოიძეს ესაუბრა, რომელმაც განაცხადა, რომ ბანერის გამოფენის გამო სამართალდარღვევის ოქმი შვიდჯერ შეადგინეს. „ზედამხედველობის სამსახურმა დააფიქსირა ადმინისტრაციული სამართალდარღვევა. კოდექსის 150-ე მუხლი ითვალისწინებს დაჯარიმებას სხვადასხვა ბანერების, პლაკატებისა და წარწერების თვითნებურად მონტაჟისა და განთავსების შემთხვევაში სახელმწიფო საკუთრებაზე.

კოდექსი პირველ შემთხვევაში ითვალისწინებს 50-ლარიან ჯარიმას, განმეორების შემთხვევაში არის 500 ლარი. შედგა შვიდი ოქმი და ყოველ სამართალდარღვევაზე იქნება შესაბამისი რეაგირება“, – აცხადებს ზოიძე.

„ბათუმელების“ კითხვაზე, თუ ვის აჯარიმებენ კონკრეტულად, ზოიძე ამბობს, რომ ბანერის გამოფენაზე პასუხისმგებელ პირს. „პირველ შემთხვევაში სხვა პიროვნება იყო, მეორე შემთხვევაში – სხვა. ვინც ადგილზეა უფლებამოსილი პირი, ის ჯარიმდება. დაახლოებით 450-ლარამდე ჯარიმა დაუგროვდათ“.

აქტივისტებმა ბანერი – „წადი გახარია“ ჩაქვის ხიდზე პირველად  12 ივლისს გამოფინეს.

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com