რა ღირს დასვენება ბეშუმსა და გოდერძიზე


ბეშუმში სეზონი ოფიციალურად გაიხსნა და საზაფხულო კურორტი დამსვენებლებს ელის. უნიკალური ჰავითა და ადგილმდებარეობით გამორჩეულ ბეშუმში დასვენება მცირე ბიუჯეტითაცაა შესაძლებელი. მაგრამ თუ მთასთან ერთად კომფორტიც გჭირდებათ, მაშინ საკმაო თანხის დახარჯვაც მოგიწევთ. მაგალითად, ერთი ღამის გათევა 20 -50 ლარის ფარგლებშია შესაძლებელი. თუ ოჯახით გსურთ გარკვეული პერიოდით დასვენება, კოტეჯის დაქირავება დღეში, საშუალოდ, 90-100 ლარია.

ბეშუმში შეგიძლიათ დაიქირაოთ კოტეჯი, ოთახი სასტუმროში ან კერძო სახლი. ფასები ყველა შემთხვევაში განსხვავებულია.

თემურ ქედელიძე ბეშუმში 33 კოტეჯს განკარგავს. კოტეჯი გათვლილია 3-5 ადამიანზე. 1 ადამინის ღამისთევის ფასი სამჯერადი კვებით 30 ლარია. თუმცა იმისათვის, რომ კოტეჯი დაიქირაოთ, მინიმუმ სამი ადამიანი მაინც უნდა იყოთ.

თემურ ქედელიძის თქმით, კოტეჯები კეთილმოწყობილია და იქ ყველანაირი პირობაა კომფორტული დასვენებისთვის. თითოეულ კოტეჯში არის ცხელი-ცივი წყალი, ინდივიდუალური აბაზანა და ტელევიზორი.

50 ლარი დაგიჯდებათ ერთი ღამით ერთი ოთახის დაქირავება  თამაზ შანთაძის სასტუმროში. თამაზ შანთაძის თქმით, ოჯახებისათვის გასაქირავებლად აქვს ასევე კეთილმოწყობილი სახლი სამი საძინებლით, რომელიც ერთი ღამით 100 ლარი ღირს.

სახლში სამი საძინებელია და 6-8 ადამიანი შეიძლება მოთავსდეს.

40-50 ლარის დაქირავება ღირს კოტეჯში ერთი ადამიანისთვის ღამის გათევა კურორტ გოდერძიზე. ამ თანხაში არ შედის კვება. კურორტზე რამდენიმე კოტეჯია. თითოეულში არის 4 სრულყოფილი სასტუმრო ოთახი და ერთდროულად მოთავსდება 12 ადამიანი. თითოეულ კოტეჯში არის დიდი ჰოლი, სამზარეულო და ბუხარი. მთლიანი კოტეჯის დაქირავება ერთი დღით 440 ლარი ღირს.

ბეშუმთან ახლოს, გოდერძის უღელტეხილზე მდებარე სასტუმროში ღამისთევა ერთადგილიან ნომერში 60 ლარი ღირს, ხოლო ორ ადგილიანში – 80 ლარი.

კოტეჯებთან არის რამდენიმე კაფე-ბარი, სადაც კვება 15-25 ლარის ფარგლებშია.

კურორტ გოდერძიზე სარემონტო სამუშაოების გამო არ მუშაობს საბაგირო. როგორც ადმინისტრაციაში აცხადებენ, საბაგირო პირველი აგვისტოდან ამუშავდება და ერთი გზა 5 ლარი ეღირება.

ამავე თემაზე:

ზაფხულის ზღაპარი ბეშუმში

ნეტგაზეთის მასალების სხვა გამოცემებში გადაბეჭდვის წესი
ავტორი