პროექტში „შენი იდეა ბათუმს“ გამარჯვებული 3 იდეა წლის ბოლომდე განხორციელდება

ბათუმის მერიის პროექტის – „შენი იდეა ბათუმს“ ფარგლებში გამარჯვებული იდეების განხორციელება წლის ბოლომდე დასრულდება. ქალაქის მერის განცხადებით, პროექტი მნიშვნელოვანია, რადგან ბიუჯეტის ხარჯვის პროცესში მოქალაქეების მონაწილეობის ზრდას უწყობს ხელს და საკონკურსე იდეებს მომავალშიც მიიღებენ ონლაინ პლატფორმაზე – https://idea.batumi.ge/.

გამარჯვებულ პროექტებს შორისაა: „ფრანების ფესტივალი“, „ნატვრის ხე“ და წარწერა „ბათუმი“, რომელიც ბათუმგორაზე განთავსდება. შერჩეული იდეების ავტორების თქმით, ეს პროექტი იდეების განხორციელებაში დაეხმარათ.

ქალაქის მერიაში განმარტავენ, რომ კონკურსის მიზანი ადგილობრივი საკითხების გადაჭრაში მოქალაქეების თანამონაწილეობის გაზრდაა.

ლაშა კუკულაძე

ფრანების ფესტივალის საორგანიზაციო ჯგუფის წევრის, ლაშა კუკულაძის თქმით, ევროპულ ქვეყნებში მსგავსი ფესტივალები დიდი პოპულარობით სარგებლობს და ტურისტები მონაწილეობის მისაღებად სპეციალურად ჩადიან. მისი აზრით, სწორედ ასეთივე სანახაობრივი იქნება ბათუმის ფესტივალიც, რომელიც არაერთ ადამიანს გააერთიანებს.

„შავი ზღვის რეგიონში ასეთი ფესტივალი არსად ტარდება. ეს ფესტივალი ბათუმის ტურისტული ბარათი გახდება,  ხელს შეუწყობს ფრანოსნობის განვითარებას და ძალიან ბევრი ტურისტი ჩამოვა ფესტივალის გამო,“ – ამბობს ლაშა კუკულაძე და აღნიშნავს, რომ ბათუმის ფესტივალისთვის ფრანებს ცნობილი დიზაინერები დაამზადებენ.

ლაშა კუკულაძის თქმით, ფესტივალის ყველა ასაკის ადამიანზეა გათვლილი. ფრანების ფესტივალზე  სხვადასხვა აქტივობაა დაგეგმილი.

„სანაპირო ზოლს ძალიან უხდება ასეთი ფესტივალი. ჩვენთან ერთად იქნებიან მხატვრები, რომლებიც ფრანებს მოხატავენ, გვეყოლება რამდენიმე დიჯეი. ფესტივალი უფასოა და ის ბათუმში ჩამოსვლის კიდევ ერთი კარგი მოტივაცია იქნება.“

თეონა კეშელავა

იდეების კონკურსის გამარჯვებულია წარწერა „ბათუმი“. ანბანის სიმაღლე 3,5 მეტრია, ხოლო სიგანე – 37 მეტრი. „ბათუმი“ ქართული და ლათინური ასოებით დაიწერება, ხოლო შუაში ბათუმის ლოგო განთავსდება. იდეის ავტორი თეონა კეშელევაა. მისი თქმით, ეს ადგილი ქალაქის სავიზიტო ბარათი გახდება:

„წარწერა ძალიან ლამაზი იქნება, განსაკუთრებით ღამით, როცა განათდება. ეს იქნება ქალაქის სავიზიტო ბარათი. ტურისტები ძველ წარწერასთანაც იღებენ ფოტოებს, თუმცა ეს ადგილი საკმაოდ მოძველებულია. ახალი ლოგო ძალიან ლამაზია და ეს წარწერა უფრო მეტად გაალამაზებს და დაამშვენებს ქალაქს.“

ნონა ქოქოლაძე

მესამე გამარჯვებული პროექტი „ნატვრის ხეა.“ იდეის ავტორის, ნონა ქოქოლაძის განცხადებით, პროექტი ნებისმიერი ასაკის ადამიანში სიხარულს და ინტერესს გამოიწვევს:

„ეს ადგილი იქნება ძალიან საინტერესო, როგორც ადგილობრივებისთვის, ისე ტურისტებისთვის. ადგილი, სადაც მისვლას არაერთი ადამიანი დაგეგმავს და არაერთ ფოტოს გადაიღებს. ეს ადგილი იქნება ჩაფიქრებული სურვილებისა და ნატვრის ახდენის სიმბოლო.“

ბათუმის მერის, ლაშა კომახიძის თქმით, მოქალაქეების თანამონაწილეობაზე დაფუძნებული ინიციატივების განხორციელება ძალიან მნიშვნელოვანია და მერიას არაერთი ასეთი ინიციატივა აქვს.

„მოქალაქეებმა შემოიტანეს და მოქალაქეებმა შეარჩიეს გამარჯვებული პროექტები. ჩვენი მუნიციპალიტეტისთვის მნიშვნელოვანია  ადგილობრივი მოსახლეობის მონაწილეობა გადაწყვეტილების მიღების პროცესში. სამივე პროექტი ძალიან საინტერესოა. ეს პროექტები განსხვავებულია იმ „ტრადიციული“ პროექტებისგან, რომელსაც ჩვენ ვაკეთებთ,“ – ამბობს ლაშა კომახიძე.

ქალაქის მერის თქმით, მუნიციპალიტეტი დააკვირდება ამ საპილოტე პროექტის შედეგებსა და ეფექტს:

„ჩვენ ასევე მოვისმენთ მრჩეველთა საბჭოს შეფასებას. მე ვფიქრობ, ყველა საფუძველი არსებობს იმისათვის, რომ ეს პროექტი გაგრძელდეს და ბიუჯეტიც გაიზარდოს. ეს ნიშნავს მოქალაქეების მეტ ჩართულობას ქალაქის ბიუჯეტის მართვაში“.

პროექტის – „შენი იდეა ბათუმს“ ფარგლებში მოქალაქეებს შესაძლებლობა ჰქონდათ ხმა მიეცათ მათთვის რჩეულ იდეისთვის. გამარჯვებული იდეების განსახორციელებლად ბათუმის მერია 120 ათასს ლარს დახარჯავს.

ბათუმის მერიაში აცხადებენ, რომ 2020 წლისთვის იდეების მიღებას მიმდინარე წლის ივლისშივე დაიწყებენ. იდეის წარსადგენად  და პროექტზე ხმის მისაცემად საჭიროა პლატფორმაზე – https://idea.batumi.ge/ ელექტრონული ხელმოწერით რეგისტრაცია ან მერიაში და მერიის სერვისცენტრებში ადგილზე რეგისტრაცია.

პროექტს ახორციელებს ბათუმის მუნიციპალიტეტის მერია. აღნიშნული პროცესის მხარდამჭერია ამერიკის შეერთებული შტატების საერთაშორისო სააგენტოს (USAID) დემოკრატიული მმართველობის ინიციატივა (GGI) და სამოქალაქო საზოგადოების ინსტიტუტი.