„სირცხვილია“, „წადი გახარია“- აქციის მოთხოვნა არ იცვლება


დღეს, პირველ ივლისს, ბათუმში, ევროპის მოედანზე, ისევ შეიკრიბნენ აქტივისტები, რომლებიც თბილისში 20 ივნისს განვითარებულ მოვლენებს ეხმიანებიან და სოლიდარობას უცხადებენ პარლამენტის წინ მიმდინარე პერმანენტულ აქციებს. საპროტესტო აქციები პარლამენტში რუსი დეპუტატის სერგეი გავრილოვის ვიზიტს მოჰყვა. აქციის მონაწილეები პარლამენტის თავმჯდომარის გადადგომას მოითხოვდნენ. საპროტესტო აქციების დარბევის შემდეგ კი აქციის მონაწილეები შს მინისტრის, გიორგი გახარიას გადადგომასაც ითხოვენ.

საპროტესტო აქცია ევროპის მოედანზე
ფოტო: ლელა დუმბაძის

„ქართული საზოგადოება არის ერთიანი და ჩვენი სახელმწიფოებრივი ღირსების და ჩვენი ინდივიდუალური ღირსების შეურაცხყოფას არავის ვაპატიებთ, მით უმეტეს რუს ოკუპანტს და ყველა იმ პირს, ვინც არის ასოცირებული ამ რეჟიმთან“, – ამბობს დავით ჯინჭარაძე, რომელიც აბუ დაბის ამერიკული უნივერსიტეტის სტუდენტია და ბათუმში არდადეგებზე დაბრუნდა.

„ჩვენი აქ დგომა ძალიან მნიშვნელოვანია, „გახარია წადი“, – ამბობს აქციის კიდევ ერთი მონაწილე, მარიეტა იობიძე.

„სირცხვილია“- საპროტესტო აქცია ევროპის მოედანზე

„ვითხოვ გახარიას გადადგომას, რადგან ის არის შს მინისტრი და პასუხისმგებლობა უნდა აიღოს იმ სისხლისღვრაზე, რაც მოაწყო 20-21 ივნისს თბილისში. უნდა დამთავრდეს პოლიტიკოსობანას თამაში და მთავრობამ გაიაზროს ის, რაც ჩაიდინა. რუსი ფიგურები არ უნდა იყვნენ საქართველოს საკანონმდებლო ორგანოში“, – გვეუბნება აქციის კიდევ ერთი მონაწილე, გოჩა სურგულაძე.

საპროტესტო აქცია -„სირცხვილია“ ბათუმის ევროპის მოედანზე ამ წუთებშიც გრძელდება.

„გახარია წადი“- საპროტესტო აქცია ევროპის მოედანზე

„გახარია წადი“- საპროტესტო აქციები ბათუმშიც გრძელდება

ბათუმში ევროპის მოედანზე ისევ შეიკრიბნენ აქტივისტები, რომლებიც თბილისში პარლამენტის წინ მიმდინარე აქციებს სოლიდარობას უცხადებენ. აქციის მონაწილეები უერთდებიან იმ მოთხოვნებს რაც თბილისის აქციაზეა და აცხადებენ, რომ შს მინისტრი გიორგი გახარია უნდა გადადგეს 20-21 ივნისის საპროტესტო აქციის დარბევის გამო.

Posted by ბათუმელები • Batumelebi.ge on ორშაბათი, 01 ივლისი, 2019

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com