ბათუმის ენმ: ჩვენს აქტივისტს თავს დაესხნენ, თავდამსხმელი მას რუსულ ენაზე აგინებდა


ბათუმის საკრებულოში ენმ-ის წევრი, მირდატ ქამადაძე აცხადებს, რომ მათი ორგანიზაციის აქტივისტს, გიორგი დიასამიძეს უცნობი პირი თავს დაესხა. ამ თავდასხმის შედეგად გიორგი დიასამიძეს შუბლზე აქვს ნახეთქი ჭრილობა. შს სამინისტროს ინფორმაციით, გამოძიება დაიწყო სისხლის სამართლის კოდექსის 126-ე, ძალადობის მუხლით.

მირდატ ქამადაძის თქმით, აქტივისტს თავს მას შემდეგ დაესხნენ, რაც ის ენმ-ის ბათუმის ოფისიდან გამოვიდა და შეკვეთილში მიდიოდა აქციის მონაწილეებთან სოლიდარობის გამოსახატად:

„ოფისიდან მანქანით დაიძრნენ აღმაშენებლის ქუჩით და როგორც კი კობალაძის ქუჩა დასრულდება, ყირამალასთან მოხდა ეს ამბავი. მაგრამ მანამდე, გზად ვიღაცამ მანქანა ჩაუყენა, ოღონდ ქართული ნომრებით. რუს ტურისტს ამბობენ, მაგრამ ნომრები ქართული იყო. ძალიან საეჭვოდ მოძრაობდა ეს მანქანა, სხვა მანქანებს ატარებდა, გარდა ჩვენი მეგობრების მანქანისა. ბოლოს როგორც კი მოახერხეს ჩვენებმა ამ მანქანისთვის გვერდის ავლა, მოუწოდეს, რომ ნორმალურად ევლო. ამ ადამიანმა იქედან რუსულ ენაზე შეაგინა. შემდგომ ეს მანქანა ისევ ჩაუდგა წინ. ბოლოს კი მანქანა ისე გაუჩერეს, რომ ჩვენებმა მოძრაობა ვეღარ გააგრძელეს“.

მირდატ ქამადაძის თქმით, რომელმაც თავის თანაპარტიელებისგან მიიღო ინფორმაცია, მანქანის გაჩერებისთანავე „საეჭვოდ მოძრავი მანქანიდან“ გადავიდა ერთი კაცი და ასევე მანქანიდან გადასულ გიორგი დიასამიძეს მიახლოებისთანავე ყოველგვარი საუბრის გარეშე დაარტყა. „ის კვლავ აგრძელებდა სიტყვიერ შეურაცყოფას, როგორც ჩვენი მეგობარი ყვება, რუსულ ენაზე“.

მირდატ ქამადაძე აცხადებს, რომ „ეს ჰგავს პროვოკაციას, რომელსაც აწყობს სავარაუდოდ სუსი, რადგან მათ ზუსტად იცოდნენ, რომ ენმ-ის წევრები მიემგზავრებოდნენ შეკვეთილში სოლიდარობის აქციაზე“.

მირდატ ქამადაძის თქმით, გიორგი დიასამიძე კლინიკიდან გამოსვლის შემდეგ ბათუმის პოლიციის პირველ განყოფილებაში იმყოფება გამოსაკითხად.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ეთერ თურაძე არის გაზეთ "ბათუმელების" მთავარი რედაქტორი 2001 წლიდან