სამინისტრო: მწერალთა სახლი ყოველთვის დარჩება მწერალთა სახლად


ლიტერატურის ეროვნული ფონდის დირექტორი ირმა რატიანი „მწერალთა სახლთან“ დაკავშირებით განცხადებას ავრცელებს, სადაც ნათქვამია, რომ „მწერალთა სახლი“ ყოველთვის იყო და დარჩება მწერლების სახლად, გაძლიერებული ფუნქციებით და რესურსებით.“

ირმა რატიანი გაუგებარს უწოდებს გავრცელებულ ინფორმაციას იმის თაობაზე, თითქოს  მწერალთა სახლი უქმდება.

„ჩემთვის გაუგებარია, საიდან წარმოიშვა ეს მითი, რომ „მწერალთა სახლი“ უქმდება. მინდა ყველა დავარწმუნო, რომ „მწერალთა სახლი“, რომელიც უკვე შეიძლება ითქვას, რომ ბრენდია, არათუ უქმდება, არამედ მწერლის სახლში ფუნქციონირებას იწყებს ქართული ლიტერატურის ეროვნული ფონდი, რომლის მთავარი მიზანი არის წიგნიერების ამაღლება ქართულ საზოგადოებაში და ქართული მწერლობის პოპულარიზაცია მსოფლიოში.

მწერალთა სახლს თავისი ისტორიიდან გამომდინარე ვერავინ  შეუცვლის სახელს, ამიტომ მეგობრებო, მინდა ყველა დაგამშვიდოთ და დაგიდასტუროთ, რომ ეს ისტორიული შენობა ყოველთვის იყო და იქნება მწერალთა სახლი“, – ნათქვამია განცხადებაში, რომელსაც განათლების, მეცნიერებისა და კულტურის სამინისტრო ირმა რატიანის სახელით ავრცელებს.

მწერლის სახლმა 24 ივნისს გაავრცელა ინფორმაცია, რომ ლიტერატურული პრემია, – „ლიტერას“ დაჯილდოების ცერემონია გადაიდო ტექნიკური მიზეზების გამო.

„მწერალთა სახლის უფლებამონაცვლედ გამოცხადდა ქართული ლიტერატურის ეროვნული ფონდი. ქვეყანაში მიმდინარე პროცესებისა და რეორგანიზაციასთან დაკავშირებული ტექნიკური მიზეზების გამო, 25 ივნისს დაგეგმილი ლიტერატურული პრემია „ლიტერას“ დაჯილდოების ცერემონია დროებით გადაიდო. განახლებულ თარიღს შეგატყობინებთ უახლოეს დღეებში,“ – ნათქვამი იყო  განცხადებაში.

„ლიტერას“ დაჯილდოების ცერემონია გადაიდო

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com