დღეს, 26 ივნისს, ბათუმელი ადვოკატები გამოეხმაურნენ თბილისში მიმდინარე აქციებს. მათი თქმით, ქვეყანაში მიმდინარე პროცესები კიდევ ერთხელ აჩვენებს საქართველოში არაფორმალურ მმართველობასა და სასამართლო სისტემაში კლანის არსებობას. ადვოკატთა ჯგუფი ჟურნალისტებთან საკუთარი პოზიციის გასაზიარებლად დღეს ევროპის მოედანზე შეიკრიბა.
ყოფილი მოსამართლე, ამჟამად ადვოკატი ირაკლი შავაძე ამბობს, რომ საზოგადოების დაცინვაა, რაც მოხდა დღეს საქართველოს პარლამენტში:
„გენერალური პროკურორი და მისი მოადგილეც კი არ მოვიდა პარლამენტში, იმდენად შეშინებულები არიან და გაგზავნეს დეპარტამენტის უფროსი. კარგი ბატონო, გაგზავნეს, მაგრამ იქ უნდა მოეტანათ, თუ აქვთ, დასაბუთებულ დონეზე მტკიცებულებათა სტანდარტი და პარლამენტარებს უნდა ჰქონოდათ შესაძლებლობა გაცნობოდნენ, მაგრამ პარლამენტში ყველაფერი ისე განვითარდა კომიტეტების სხდომაზე, შეიქმნა შთაბეჭდილება, რომ „ქართული ოცნების“ საპარლამენტო უმრავლესობას მიღებული ჰქონდა დავალება, რომ ეს გადაწყვეტილება უნდა მიეღოთ, მაგრამ ისე უსუსურად, ისე არაკვალიფიციურად, არასამართლებრივად გააკეთეს ეს, რომ ელემენტარულად, სამართალზე ლაპარაკიც ზედმეტია. თუ კი შუამდგომლობა დადგება სასამართლოში, იქაც ერთი რომელიმე კოლექტიური მურუსიძე, რომელსაც მხარს უჭერს „ქართული ოცნება“, დიდი ალბათობით გამოიტანს პატიმრობის შესახებ გადაწყვეტილებას.
ის ადამიანები, ვინც დღეს ხელისუფლებას უკრავს ტაშს, სწორედ ის ადამიანები არიან, რომლებიც მთელი ცხრა წლის მანძილზე ნაციონალურ მოძრაობას უკრავდნენ ტაშს, მათ სახელმწიფოებრიობის შეგრძნება, განცდა, არა აქვთ“ – გვითხრა ირაკლი შავაძემ.
ადვოკატი ირმა ზოიძე ამბობს, რომ აბსოლუტურად სამართლიანად მიაჩნია ის მოთხოვნები, რაც თბილისში გამართულ აქციებზე გაჟღერდა და მათ შორის შს მინისტრის გადადგომის მოთხოვნა.
„ადვოკატი ვარ, რიგითი მოქალაქე და ძალიან შემტკივა გული, რომ ქვეყანაში არ არის ინსტიტუციური მართლწესრიგი, ქვეყანას მართავს ოლიგარქი, სასამართლოს მართავს კლანი. სახელმწიფომ უკან დაიხია [2020 წელს პროპორციული არჩევნების ჩატარების დაპირებითა და 20 ივნისის აქციაზე დაკავებულების გამოშვებით], მაგრამ ეს არ არის საკმარისი. ამ ყველაფერს ზემოდან მართავს კლანი, ოლიგარქი და ეს არის ინსტიტუციური ქაოსი,“ – ამბობს ირმა ზოიძე.
ინსტიტუციების მოშლა და უპატივცემულობა – ასე უწოდებს სამართალმცოდნე ირმა შარაძე საქართველოში ბოლო კვირაში განვითარებულ მოვლენებს:
„იმის ნაცვლად, რომ დასაჯონ ის პირები, ვინც დააზარალა, დაასახიჩრა ადამიანები, ცდილობენ გადაბრალებას სხვაზე, რასაც არ მიიღებს ნორმალური საზოგადოება. ჩვენ ვიცავთ ადამიანის უფლებებს სასამართლოში, ეს რაც ვნახეთ [აქციაზე 305 დაკავებულის სასამართლო პროცესები], იყო კოლექტიური გასამართლება, რასაც აძლევენ სასამართლოს ფორმას და ეს ხდება არაფორმალური მმართველის ბრძანებით. ათი სპეცრაზმელისთვის უფლებამოსილების შეჩერება პასუხისმგებლობას არ უხსნის ბრძანების გამცემს და ამ ბრძანების გამცემი პირველ რიგში არის შინაგან საქმეთა მინისტრი და კიდევ უფრო დიდი დანაშაულია, როცა სახელმწიფო სტრუქტურის წარმომადგენელი ასრულებს არაფორმალური მმართველის დავალებას,“ – ამბობს ირმა შარაძე.
„როცა ხელისუფლება უპირისპირდება თავის ამომრჩეველს, თავის მოქალაქეს და თვალებს თხრის, ამის მოთმენა მეტისმეტია,“ – მიიჩნევს ადვოკატი ლელა ბჟალავა. მისი აზრით, საზოგადოების პროტესტი სამართლიანია:
„თქვენ ხედავთ, რომ გაჭირვების, დოლარის ვარდნის, ბანკების მიერ განადგურებული ხალხი ქუჩაში არ გამოსულა, მაგრამ ხალხი ერთსულოვნად გამოვიდა ქუჩაში მაშინ, როცა ოკუპანტი დაჯდა საქართველოს პარლამენტში. ეს იყო მეტისმეტი 2008 წლის ომის შემდეგ,“ – აღნიშნა ლელა ბჟალავამ.
