„ორბი ჯგუფს“ ეცნობა, დაუყოვნებლივ შეწყვიტოს სამუშაოები სასპორტო სკოლასთან – სამინისტრო


აჭარის ფინანსთა და ეკონომიკის სამინისტროსგან მიღებული ინფორმაციით, ბათუმის სასპორტო სკოლის მიმდებარე ტერიტორიაზე მიმდინარე სამუშაოებთან დაკავშირებით, „მოქმედი კანონმდებლობის შესაბამისად, კომპანიას [„ორბი ჯგუფი ბათუმი“] ეცნობა სამუშაოების დაუყოვნებლივ შეწყვეტის თაობაზე“.

ბათუმის სასპორტო სკოლასთან, ფიროსმანის ქუჩაზე, რამდენიმე დღეა, სავარაუდოდ, გეოლოგიური სამუშაოები მიმდინარეობს. აღნიშნული ტერიტორია აჭარის ავტონომიური რესპუბლიკის საკუთრებაა და ის იჯარით აქვს გადაცემული კომპანია „ორბი ჯგუფი ბათუმს“.

კომენტარისთვის სამინისტროს გუშინ, 25 ივნისს, დავუკავშირდით, თუმცა მიმდინარე სამუშაოებთან დაკავშირებით ინფორმაცია არ ჰქონდათ. „სამინისტროს შესაბამისი სამსახურის თანამშრომლები დღესვე გავლენ ადგილზე, გაერკვევიან სიტუაციაში და ამის შემდეგ გვექნება კანონის შესაბამისი რეაგირება“, – გვითხრეს გუშინ სამინისტროში.

კონკრეტულად რა სამუშაოებს ატარებს „ორბი“ ამ ტერიტორიაზე, სამინისტროდან ინფორმაცია ვერც დღეს მივიღეთ.

„ბათუმელები“ კომენტარს „ორბი ჯგუფისგანაც“ ელოდება.

როგორც „ბათუმელებს“ ადგილზე ერთ-ერთმა დასაქმებულმა უთხრა, აქ „ორბის“ დაკვეთით მიწის სინჯებს იღებენ, „300 მეტრზე ჩადიან…“.

ამ თემაზე: 

რას თხრის „ორბი ჯგუფი“ ბათუმის სასპორტო სკოლასთან

სასპორტო სკოლის მიმდებარე ტერიტორიაზე აღებული გრუნტის ნიმუშები / 25.06.2019 / ფოტო „ბათუმელები“

სასპორტო სკოლის მიმდებარე ტერიტორიაზე ეს „ორბის“ მიერ უნებართვო/შეუთანხმებელი სამუშაოების ჩატარების პირველი შემთხვევა არ არის. 2018 წელს ბათუმის სასპორტო სკოლის მიმდებარედ 3022 კვ.მ მიწის ნაკვეთი „ორბი ჯგუფი ბათუმმა“ უნებართვოდ დაიკავა და თვითნებურად ღობეც შემოავლო. მოგვიანებით კი, ეს ნაკვეთი აჭარის ფინანსთა და ეკონომიკის სამინისტრომ აუქციონზე გაიტანა და ის იჯარით „ორბი ჯგუფი ბათუმმა“ აიღო.

ამ თემაზე:

„ორბი ჯგუფი ბათუმის“ მიერ უნებართვოდ დაკავებულ ტერიტორიას სამინისტრო 2 წლით ასხვისებს

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com