ბათუმის საკრებულოში ხვალ, 31 მაისს, რიგგარეშე სხდომაა დაგეგმილი. სხდომის დღის წესრიგში ერთ-ერთი საკითხი საკრებულოს იურიდიულ და საპროცედურო საკითხთა კომისიის თავმჯდომარის, ომარ მახარაძის თანამდებობიდან გადაყენებაა.
პოსტის დატოვების შესახებ ომარ მახარაძემ განცხადება თავად დაწერა. ეს გადაწყვეტილება მას შემდეგ მიიღო, რაც ის თავისმა სტუდენტმა სექსუალურ შევიწროებაში დაადანაშაულა. ომარ მახარაძემ საკრებულოში საკუთარი სურვილით დატოვა ასევე ფრაქცია „ქართული ოცნება“.
ომარ მახარაძე საკრებულოში მაჟორიტარული წესითაა არჩეული „ქართული ოცნების“ წარდგინებით, სექსუალურ შევიწროებაში მისი დადანაშაულების შემდეგ საკრებულოს თავმჯდომარემ, სულიკო თებიძემ თქვა, რომ ბრალდების დადასტურების შემთხვევაში ვინც არ უნდა ყოფილიყო, ის უმკაცრესად დაისჯებოდა. ამ ფაქტზე მიმდინარეობს გამოძიება.
„ბათუმელების“ ინფორმაციით, „ოცნების“ უმრავლესობა ხვალ, 31 მაისს, სხდომაზე მხარს დაუჭერს ომარ მახარაძის გადაყენებას და საკრებულოს ხუთი წევრი ასევე უმრავლესობიდან ამ თანამდებობაზე თემურ კახიძის წარდგენას გეგმავს.
თემურ კახიძე საკრებულოს ახალი წევრია, მან 23 აპრილს ირაკლი მიქელაძე ჩაანაცვლა, რომელმაც ასევე საკუთარი განცხადების საფუძველზე დატოვა საკრებულო.
თემურ კახიძე უმაღლესი საბჭოს ყოფილი წევრია, აქ ის „თავისუფალი დემოკრატების“ კვოტით მოხდა და გარკვეული პერიოდის განმავლობაში იურიდიული კომისიის თავმჯდომარის თანამდებობასაც იკავებდა.
