Batumelebi | როგორც შვილებს ვერ განასხვავებ ადამიანი, ისეა დელფინებიც – დელფინების მწვრთნელი როგორც შვილებს ვერ განასხვავებ ადამიანი, ისეა დელფინებიც – დელფინების მწვრთნელი – Batumelebi
RU | GE  

როგორც შვილებს ვერ განასხვავებ ადამიანი, ისეა დელფინებიც – დელფინების მწვრთნელი

კახა ახალაძე ბათუმის დელფინარიუმის პირველი კატეგორიის მწვრთნელია. სპორტსმენია. 12 წლის მანძილზე ფეხბურთს თამაშობდა, დელფინარიუმში გახსნის დღიდან მუშაობს.

„პირველი ეტაპი ადვილი არ იყო. საკმაოდ რთული, დატვირთული გრაფიკი მქონდა. თავიდან თითქმის 24-საათიან რეჟიმში გვიწევდა მუშაობა. ერთის  მხრივ ჩვენ ვსწავლობდით როგორ უნდა გაგვეწვრთნა დელფინები, როგორ დავმეგობრებულიყავით და მეორეს მხრივ დელფინებსაც ვასწავლიდით. სწავლის პროცესი დღესაც ანალოგიურად გრძელდება. მიუხედავად იმისა რაც გამოვიარეთ, მაინც რთულ რამეებთან გვიწევს გამკლავება.

სამი რამ არის დელფინთან მუშაობისას მთავარი – მეგობრობა, ურთიერთობა და ნდობა. როგორც შვილებს ვერ განასხვავებ ადამიანი, ისეა დელფინებიც. ყველა მიყვარს. ყველა ჩემი ფავორიტია,“ – ამბობს კახა.

დელფინარიუმში მეგზურობას გვიწევს. აუზთან, რომლის კიდესთანაც ვდგევართ და რომელიც დელფინებითაა სავსე, ერთი დელფინი მოცურდა.

„ეს ციცია, ორი შვილის დედა. ძალიან ცნობისმოყვარეა, შეამოწმა ვინ მოვიდა,“ – ამბობს კახა და დელფინს ხელს უქნევს. დელფინი აუზის სიღრმეში ბრუნდება, კიდესთან მეორე მოდის.

„ეს ნინია, პირველი დელფინი, რომელიც ბათუმის დელფინარიუმში დაიბადა ათი წლის წინ,“ – მიხსნის კახა.

დელფინების მწვრთნელი

"სამი რამ არის დელფინთან მუშაობისას მთავარი – მეგობრობა, ურთიერთობა და ნდობა. როგორც შვილებს ვერ განასხვავებ ადამიანი, ისეა დელფინებიც. ყველა მიყვარს. ყველა ჩემი ფავორიტია,“ – ამბობს კახა ახალაძე.კახა ბათუმის დელფინარიუმის პირველი კატეგორიის მწვრთნელია და დელფინარიუმში გახსნის დღიდან მუშაობს.

Posted by ბათუმელები • Batumelebi.ge on ხუთშაბათი, 30 მაისი, 2019

დელფინარიუმში სამუშაო დღე ათ საათზე იწყება. მწვრთნელი ყველა დელფინს ამოწმებს და საკვებს უმზადებს. დელფინების ტრენინგები დღის მანძილზე 4-5 საათს გრძელდება.

„ვიზუალურად ვათვალიერებთ, ვინმე მოწყენილი ხომ არაა, რამე კონფლიქტი ხომ არ იყო და ა.შ. შემდეგ უკვე გადავდივართ ტრენინგებზე. ოთხი ტრენინგი გვაქვს დღის განმავლობაში. თუ შოუ გვაქვს, მაშინ ხუთი-ექვსი ტრეინინგი შოუსთან ერთად. ჩემთვის ეს სამსახური პირველ რიგში დიდ პასუხისმგებლობას ნიშნავს. როგორც პატარა ბავშვები ისე არიან ზღვის ძუძუმწოვრები. დელფინები ძალიან საინტერესო და უნიკალური ზღვის ბინადრები არიან. აქვთ თავიანთი ხასიათი. როგორც ჩვენ ადამიანები, ისე დელფინებიც ერთმანეთისგან განსხვავდებიან ვიზუალურადაც და  ხასიათითაც,“ – ამბობს კახა.

კახა ამბობს, რომ სამუშაო, რომელსაც ასრულებს სასიამოვნოა, მაგრამ ამავდროულად საკმაოდ მძიმეცაა.

„დილიდან ღამემდე გვიწევს შრომა და ურთიერთობა დელფინებთან. იყო რამდენიმე შემთხვევა ვაკანსია გვქონდა და მოვიდნენ. სპორტულებიც იყვნენ, უნდოდათ ძალიან მუშაობა, მაგრამ რომ შეხედეს რა შრომის გაღება გვიწევს, ხელები აწიეს- ჩვენ აქ ვერ ვიმუშავებთო.

„თავგანწირვა, მოტივაცია და მიძღვნა საკუთარი თავის, საქმისადმი, რომელსაც აკეთებ – აი, რა სჭირდება დელფინების მწვრთნელს. აქ რომ მოდიხარ თავს უძღვნი ამ საქმეს,“ – ამბობს კახა.

ბათუმის დელფინარიუმში 20 დელფინი ბინადრობს. დელფინის სიცოცხლის ხანგრძლივობა საშუალოდ 35-40 წელია. დღის განმავლობაში ერთი მოზრდილი დელფინი საშუალოდ 8-დან 15 კილოგრამ თევზს ჭამს.

80 ტონა თევზი წელიწადში – დელფინარიუმის ბინადართა კვების რაციონი

ნეტგაზეთის მასალების სხვა გამოცემებში გადაბეჭდვის წესი
ავტორი