ნეტგაზეთი • RU

„ბაბილონ თაუერი“ 25 მილიონ ლარად გაიყიდა

ბათუმში, რუსთაველის #30-ში, მშენებარე პროექტი „ბაბილონ თაუერი“ 24 მილიონ 990 000 ლარად გაიყიდა.  მშენებარე პროექტი „ემ სი ქონსთრაქშენმა“ იყიდა.

აუქციონით განსაზღვრული პირობების მიხედვით, ახალი მფლობელი ყველა იმ ვალდებულებას აიღებს, რასაც უკვე ყოფილ მეპატრონეს, Tam Geo- ს აჭარის მთავრობასთან გაფორმებული ხელშეკრულება ავალდებულებდა.

„ემ სი ქონსთრაქშენი“ 2019 წლის 20 მაისს თურქეთის მოქალაქემ დააფუძნა.

2019 წლის 15 აპრილს აჭარის მთავრობასა და შპს Tam Geo-ს შორის ახალი შეთანხმება გაფორმდა. ახალი  პირობებით Tam Geo-ს  2012 წელს აღებული ვალდებულება   2022 წლამდე უნდა შეესრულებინა. კომპანია ვადის გადაწევასთან ერთად გათავისუფლდა ვალდებულებების შეუსრულებლობისთვის დარიცხული ჯარიმებისგანაც.

ამ თემაზე: ბათუმში „ბაბილონ თაუერის“ მშენებლობა გაგრძელდება – 141 მეტრიანი შენობა რუსთაველზე

აჭარის ფინანსთა და ეკონომიკის სამინისტროს განმარტებით, ქონების აუქციონზე გატანის მიზეზი შპს Tam Geo-სა და მის დამფუძნებლებს შორის დავა გახდა: „კომპანიას დამფუძნებლების მიმართ საკმაო დავალიანება დაუგროვდა. აუქციონზე ქონება, მართალია, იყიდება, თუმცა იმ პირობებით და ვალდებულებებით, რაც 2019 წლის 15 აპრილის შეთანხმების აქტითაა განსაზღვრული. ქონების მყიდველს ამ ვალდებულებების შესრულება მოუწევს.“

აუქციონზე  მიწის ორი ნაკვეთი იყო გატანილი, მასზე განთავსებული უძრავი ქონებით.

ამავე თემაზე:

„ბაბილონ თაუერი“ – დაუსრულებელი მშენებლობა ბათუმის ცენტრში

 

ნეტგაზეთის მასალების სხვა გამოცემებში გადაბეჭდვის წესი
ავტორი