განათლება,მთავარი,სიახლეები

ბათუმის რომელ საჯარო სკოლებშია თავისუფალი ადგილები – პირველკლასელთა რეგისტრაცია

22.05.2019 • 4224
ბათუმის რომელ საჯარო სკოლებშია თავისუფალი ადგილები – პირველკლასელთა რეგისტრაცია

ბათუმის საჯარო სკოლებში პირველკლასელთა რეგისტრაცია მიმდინარეობს. ამ დროისთვის ადგილები ქალაქის ცენტრალურ უბნებში მდებარე საჯარო სკოლებში შევსებულია, გარეუბანში მდებარე სკოლებში კი 160 ადგილია დარჩენილი.

პირველკლასელთა რეგისტრაცია საცხოვრებელი ადგილის მიხედვით არ იზღუდება და ქალაქის ცენტრში მდებარე სკოლაში რეგისტრაცია გარეუბნებში მცხოვრებ ბავშვებსაც შეუძლიათ.

ბათუმში სულ 27 საჯარო სკოლაა. აქედან პირველკლასელების მიღება ამ ეტაპზე  მხოლოდ შვიდ საჯარო სკოლას შეუძლია.

ეს სკოლებია: მე-4, მე-9, მე-10, მე-11, მე-17, მე-20 და 25-ე საჯარო სკოლები. ამ სკოლებში 175 ადგილი დაემატება პირველკლასელთათვის.

დადგენილი ნორმის მიხედვით, საჯარო სკოლას უფლება არ აქვს, კლასში 25-ზე მეტი მოსწავლე ჰყავდეს, თუმცა როგორც ბათუმის რესურსცენტრის ხელმძღვანელი,  გოჩა დავითაძე „ბათუმელებთან“ ამბობს, ისინი შეხვდნენ სკოლის დირექტორებს და ზემოთ აღნიშნულ სკოლებში ადგილების დამატებით გამონახეს გამოსავალი.

„რადგან გარკვეული კატეგორიის ბავშვები დარჩნენ დაურეგისტრირებელი, ამიტომ გადავხედეთ სკოლების მატერიალურ-ტექნიკურ ბაზას და ვისაც შესაძლებლობა ჰქონდა ერთი საკლასო ოთახის დამატების, იმ სკოლებში დავამატეთ,“ – ამბობს გოჩა დავითაძე.

„ამდენი საცხოვრებელი კორპუსი შენდება და არც ბაღები ემატება და არც სკოლები. მოსახლეობა გაიზარდა, სკოლა კი წლებია არ აშენებულა, პირიქით რამდენიმე დაიხურა კიდეც წინა წლებში.

პრემიერ-მინისტრმა დააანონსა კომაროვის სკოლის მშენებლობა ბათუმში და როცა აშენდება, 250 ადგილი იქ გაჩნდება, მე-6 საჯარო სკოლაში იწყება მეორე კორპუსის მშენებლობა, რომელიც 500 ბავშვზეა გათვლილი. ვმუშაობთ, რომ მე-14 და მე-15 სკოლებშიც აშენდეს დამატებითი ფართები. გარდა ამისა, გვინდა ახალი სკოლის აშენებაც, მაგრამ ჯერ ადგილი ვერ გამოვნახეთ,“ – ამბობს გოჩა დავითაძე.

რაც შეეხება გარეუბნებში მდებარე სკოლებში თავისუფალ ადგილებს, პირველკლასელების მიღება შეუძლიათ ბათუმის 26-ე 27-ე, 28-ე, 29-ე, 30-ე და 31-ე სკოლებს. ამ სკოლებში ჯამში 160 ადგილია.

პირველკლასელთა რეგისტრაცია 12 ივნისამდე გაგრძელდება. ამ დროისთვის რამდენმა პირველკლასელმა ვერ მოახერხა სასურველ სკოლაში დარეგისტრირება, უცნობია. როგორც გოჩა დავითაძე ამბობს, დეტალური ინფორმაციის შეგროვებას ახლა იწყებენ.

გადაბეჭდვის წესი


ასევე: