ტოლერანტობის ინსტიტუტის 2019 წლის კვლევის მიხედვით, ბოლო წლებში გამკაცრდა სახელმწიფო პოლიტიკა უცხო ქვეყნის მოქალაქეთა მიერ საზღვრის გადმოკვეთისას.
სახელმწიფო, ხშირ შემთხვევაში, კონკრეტული ქვეყნების წარმომადგენლებს საქართველოში შემოსვლაზე დაუსაბუთებელ უარს ეუბნება. შინაგან საქმეთა სამინისტროს მონაცემების მიხედვით, 2018 წელს საზღვრის გადმოკვეთაზე ყველაზე მეტი უარი ეთქვათ ირანისა და ინდოეთის მოქალაქეებს (ირანი – 3224, ინდოეთი – 2254). უარის თქმის საფუძვლებზე შსს სტატისტიკას არ აწარმოებს
TDI ინფოგრაფიკა ტოლერანტობისა და მრავალფეროვნების ინსტიტუტის კვლევიდან: „რასობრივი შეუწყნარებლობა და ქსენოფობია – უცხოელთა უფლებრივი მდგომარეობა საქართველოში”.
ამავე კვლევაში აღნიშნულია, რომ 2016-2018 წლებში საქართველოში გამოვლინდა უცხო ქვეყნების (განსაკუთრებით აზიისა და აფრიკის) წარმომადგენლებისა და მიგრანტების მიმართ ძალადობის, აგრესიისა და ქსენოფობიის მზარდი ტენდენცია.
„ნეოფაშისტური და ულტრანაციონალისტური ჯგუფები საჯარო სივრცეში ხშირად ჩნდებიან და თავს ესხმიან კონკრეტული ეროვნებისა თუ იდენტობის მქონე ადამიანებს. ამ ჯგუფების აქტიურობა კი 2017 წლის ივლისის შემდეგ, აღმაშენებლის გამზირზე ორგანიზაცია „ქართული მარშის“ მიერ გამართული მსვლელობის შემდეგ გაიზარდა. ქსენოფობიური აქციის მთავარი მოწოდება ქვეყნიდან არალეგალურად მყოფი მიგრანტების გაძევება იყო“, – ნათქვამია კვლევაში.
