მთავარი,სიახლეები

კურორტ გოდერძიზე ახალი წყალსადენი უნდა აშენდეს – Goderdzi Resorts-ი სავარაუდო ფასს ადგენს

08.05.2019 • 1650
კურორტ გოდერძიზე ახალი წყალსადენი უნდა აშენდეს – Goderdzi Resorts-ი სავარაუდო ფასს ადგენს

„კურორტ გოდერძის სრული განაშენიანების შემდეგ არსებული წყლის მარაგი საკმარისი აღარ იქნება, ამიტომ დამატებით საჭიროა აშენდეს ახალი წყალსადენის მაგისტრალი და სამარაგო რეზერვუარი ორი 500 კუბური მეტრი ტევადობით, საქლორატოროებთან ერთად, რაც გათვალისწინებულია კურორტის განაშენიანების გენერალური გეგმით,“ – აცხადებს შპს Goderdzi Resorts-ი. ამ კომპანიის 100% წილის მფლობელი აჭარის ავტონომიური რესპუბლიკაა. კომპანია კურორტის განვითარებაზეა პასუხისმგებელი.

ხულოში, სამთო-სათხილამურო კურორტის [ზანკა] წყალსადენის სისტემის მშენებლობა-რეაბილიტაციის საპროექტო-სახარჯთაღრიცხვო დოკუმენტაციის მომზადების სავარაუდო ფასის დასადგენად Goderdzi Resorts-ი ბაზარს იკვლევს. შეთავაზებებს, წერილობითი სახით, კომპანია 2019 წლის 13 მაისის ჩათვლით მიიღებს.

სავარაუდო ფასის დადგენის შემდეგ კომპანია წყალსადენის სარეაბილიტაციო პროექტს შეისყიდის, შემდეგ კი – ახალი მაგისტრალის მშენებლობაზე გამოაცხადებს ტენდერს.

კომპანიის განაცხადის მიხედვით, „კურორტ გოდერძის წყალმომარაგება ხორციელდება თვითდინებით კურორტის ზემოთ მიმდებარე ტერიტორიაზე არსებული მარაგებიდან. არსებული წყალსადენის შემადგენლობაშია სათავე ნაგებობები, მაგისტრალი და ერთი ხუთასი კუბური მეტრი მოცულობის რკინაბეტონის რეზერვუარი. აღნიშნული წყალსადენის ქსელი საჭიროებს სარეაბილიტაციო სამუშაოებს… წყალსადენის ახალი ქსელის მოწყობისთვის საწყის ეტაპზე უნდა განხორციელდეს არსებული წყლის საბადოების მარაგების და ვარგისიანობის [ლაბორატორიული კვლევა] შესწავლა-დადგენა“.

კურორტ გოდერძიზე ახალი მაგისტრალის მშენებლობა კი, მარაგების საჭირო რაოდენობისა და წყლის ლაბორატორიული კვლევების დადებითი დასკვნების შემთხვევაში უნდა დაიგეგმოს.

გადაბეჭდვის წესი


ასევე: