Batumelebi | რეზო ხარაზი: თორნიკე რიჟვაძეს ფინანსურ დარღვევებზე კონკრეტული დოკუმენტები მოვუტანე რეზო ხარაზი: თორნიკე რიჟვაძეს ფინანსურ დარღვევებზე კონკრეტული დოკუმენტები მოვუტანე – Batumelebi
RU | GE  

რეზო ხარაზი: თორნიკე რიჟვაძეს ფინანსურ დარღვევებზე კონკრეტული დოკუმენტები მოვუტანე

დღეს, პირველ მაისს, ენმ-ს წარმომადგენელი რეზო ხარაზი აჭარის მთავრობის თავმჯდომარესთან შეხვედრას ითხოვდა. მან ჟურნალისტებს უთხრა, რომ აჭარის მთავრობის თავმჯდომარეს, თორნიკე რიჟვაძეს იმ დარღვევების შესახებ მოუტანა დოკუმენტები, რომლებიც საბიუჯეტო სახსრების არაეფექტურ ხარჯვაზე მეტყველებს.

„მე მოვიტანე კონკრეტული დოკუმენტები, მტკიცებულებები სავარაუდო კორუფციულ სქემებზე. დავიწყებ თორნიკე რიჟვაძის აპარატის უფროსით, არჩილ ჩიქოვანით, ვნახოთ რა ოდენობის თანხებია არაეფექტურად გახარჯული, მისი საგზაო დეპარტამენტში მუშაობის დროს.

რატომ არიან დღეს ბათუმის მერიაში ის პირები დაწინაურებულები, რომლებიც 2012 წლიდან მოყოლებული იყვნენ კონკრეტულ კორუფციულ სქემებში ჩართული, მაგალითად, სულხან ევგენიძე, რომლის მიმართაც არაერთი კითხვის ნიშანია ქობულეთის მუნიციპალიტეტის გამგებლად მუშაობის პერიოდში და ახლაც ვფიქრობ, რომ ბათუმის მერიის ინფრასტრუქტურის სამსახურში ძალიან სერიოზული პრობლემებია, რაც აუდიტის სამსახურმა დაადასტურა“, – ამბობს ხარაზი.

„ბათუმელების“ კითხვაზე, შეუძლია თუ არა დაასახელოს კონკრეტული პროექტები, რაშიც ის აღნიშნული პირების ბრალეულობაზე საუბრობს, რეზო ხარაზი ამბობს: „ერთ-ერთი მნიშვნელოვანი პროექტი იყო ზენითის გზის რეაბილიტაცია, სადაც გაკეთებული გზა თავიდან გააკეთეს, რომლის მიზნობრიობაც არის გამოსაკვლევი და ასევე თანხებიც იყო გაზრდილი.

ასევე მნიშვნელოვანია ბეტონის შესყიდვები საავტომობილო გზების დეპარტამენტის მიერ, სხვადასხვა გზის რეაბილიტაცია“, – ამბობს ხარაზი.

რეზო ხარაზი ამბობს, რომ აჭარის მთავრობის თავმჯდომარესთან მისი ვიზიტი თორნიკე რიჟვაძის გუშინდელმა განცხადებამ განაპირობა, სადაც ის საკადრო ცვლილებებზე საუბრობს და ამბობს, რომ ეს საკადრო ცვლილება კორუფციასთან ბრძოლას უკავშირდება.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com