ბათუმში საცხოვრებელ კორპუსში წყლის 28 მრიცხველი მოიპარეს


ბათუმში, ლერმონტოვის 105-ში მდებარე ათსართულიან საცხოვრებელ კორპუსში 28 ცალი დამონტაჟებული წყლის მრიცხველი მოიპარეს. კორპუსი ახალაშენებულია. ადგილობრივების თქმით, წყლის მრიცხველები შეიცავს ლითონს (ლატუნს) და შესაძლოა ჯართში ჩაბარების მიზნით მოიპარეს.

შსს-ს ინფორმაციით, შემთხვევა დაახლოებით ერთი კვირის წინ მოხდა და გამოძიება სსკ-ის 177-ე მუხლით მიმდინარეობს, რაც გულისხმობს სხვისი ნივთის ფარულად დაუფლებას, მართლსაწინააღმდეგო მისაკუთრების მიზნით.

ბათუმში, ათსართულიან საცხოვრებელ სახლში წყლის მრიცხველები მოიპარეს.

შპს „ბათუმის წყალის“ განმარტებით, ერთი მრიცხველის საბაზრო ღირებულება ასი ლარია. მრიცხველის მონტაჟისთვის კომპანიას ბინის მეპატრონემ ან მშენებელმა კომპანიამ უნდა მიმართოს.

„გამომდინარე იქედან რომ ეს სახლი არ არის ჯერ ჩაბარებული, მრიცხველების აღდგენა მეპატრონემ ან მშენებელმა კომპანიამ უნდა უზრუნველყოს“-ამბობს „ბათუმელებთან“ საუბარში, კომპანიის პრესსამსახურის წარმომადგენელი. მისი თქმით, თითოეულ მრიცხველს, რომელსაც „ბათუმის წყალი“ ამონტაჟებს, უნიკალური კოდი აქვს და მრიცხველის დაზიანების ან დაკარგვის შემთხვევაში, ახალი უნდა დამონტაჟდეს.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com