პოლიციელისთვის ქვის ჩარტყმაში ბრალდებული სასამართლომ გირაოთი გაათავისუფლა


მოსამართლე თამარ ბეჟანიშვილმა წინასწარი პატიმრობიდან გაათავისუფლა პოლიციელებზე თავდასხმაში ბრალდებული გიორგი ა. მოსამართლემ მისი დაკავების წესი დარღვეულად მიიჩნია. საქმეში დაზარალებულად ცნობილი ირაკლი შაქარიშვილია, ქობულეთის რაიონული სამმართველოს უბნის ინსპექტორების განყოფილების უფროსი.

საუბარია 27 მარტს მომხდარ შემთხვევაზე – ქობულეთში პოლიციელებს თავს დაესხნენ. იმავე დღეს პოლიციელებმა ამ საქმეში კიდევ ერთი ბრალდებული ირაკლი ც. დააკავეს და მას წინასწარი პატიმრობა უკვე შეუფარდეს. მეორე ბრალდებული  გიორგი ა. კი, სამართალდამცველებმა შემთხვევიდან სამი დღის შემდეგ, 30 მარტს ბათუმში დააკავეს, როცა გიორგი ერთ-ერთ საადვოკატო ბიუროში ადვოკატთან გასასაუბრებლად მივიდა.

მანამდე მისი დაკავება სცადეს ქობულეთში, მაგრამ ის პოლიციელებს გაექცა.

„მოსამართლემ მიიჩნია, რომ ქობულეთში გიორგი ა.-ს დაკავების პროცედურა იყო დარღვეული… მოსამართლემ დარღვევებიდან გამოყო ის, რომ პოლიციელები და, მათ შორის ირაკლი შაქარიშვილი, დაკავების დროს სამოქალაქო ფორმაში იყვნენ. ასევე დაზარალებულად ცნობილი პოლიციელი – ირაკლი შაქარიშვილი აკავებდა გიორგის. პროკურატურის ვერსიით, გიორგი პოლიციელებს მაინც გაექცა. ლოგიკური წინააღმდეგობა დაინახა სასამართლომ იმაში, რომ თითქოს გიორგი პოლიციელების უბნის ინსპექტორების უფროსს ურტყამდა, ქვა ჩაარტყა და ჟილეტი შემოახია და ამ დროს სხვა პოლიციელებმა იგი არ დააკავეს…“ – ამბობს ბრალდებულის ადვოკატი, პაატა ნაკაიძე.

ამ საქმეში დაზარალებულად ცნობილი ორი პოლიციელია. პოლიციელის თავდასხმაში ბრალდებული გიორგი ა. სასამართლომ 15 ათასი ლარი გირაოს სანაცვლოდ გაათავისუფლა.

ქობულეთში პოლიციელებს ფიზიკური შეურაცხყოფა მიაყენეს

 

ნეტგაზეთის მასალების სხვა გამოცემებში გადაბეჭდვის წესი
ავტორი