მანდატურის სამსახურის ინფორმაციით, აჭარის ექვს საჯარო სკოლაში მანდატურები შევიდნენ. დღეიდან მანდატურები იმუშავებენ ხელვაჩაურის მუნიციპალიტეტის ოთხ სკოლაში, კერძოდ: სალიბაურის, ჭარნალის, ახალსოფლის და ფერიის საჯარო სკოლებში. ასევე, მანდატური იმუშავებს ქობულეთის მუნიციპალიტეტში სოფელ ლეღვას საჯარო სკოლაში და დაბა ქედის საჯარო სკოლაში. ამ სკოლებში მანდატურები აქამდე არ იყვნენ.
როგორც მანდატურის სამსახურში „ბათუმელებს“ უთხრეს, ზოგიერთ სკოლაში 2-2 მანდატური იმუშავებს, ზოგან კი – სამიც.
მანდატურის სამსახურის ინფორმაციით, აჭარის გარდა მანდატურები კახეთის, გურიის, სამეგრელოს, სამცხე-ჯავახეთის, ქვემო ქართლისა და მცხეთა-მთიანეთის სკოლებშიც დაემატა.
„მანდატურებმა უკვე დაიწყეს მუშაობა აღნიშნულ სკოლებში და აღჭურვილი არიან შესაბამისად“ – გვეუბნებიან მანდატურის სამსახურში. მათი ინფორმაციით, მანდატურებმა გადამზადება გაიარეს ეფექტური კომუნიკაციისა და კონფლიქტების მართვის უნარებში და მოზარდის განვითარების ფსიქოლოგიური ასპექტებიც შეისწავლეს.
ამ დროისთვის მანდატურები 233 საჯარო სკოლაშია წარმოდგენილი.
____________________
მთავარი ფოტო: მანდატურების წარდგენა ლეღვას საჯარო სკოლაში. ფოტო: მანდატურის სამსახური FB
