ბათუმი რივიერა – ისტორია, დეტალები და „სილქ როუდ ჯგუფის“ გეგმები

„სილქ როუდ ჯგუფის“ მიერ და „საქართველოს თანაინვესტირების ფონდის“ მხარდაჭერით, ქალაქ ბათუმში „ბათუმი რივიერას“ პროექტის განხორციელება იგეგმება. ეს იქნება თანამედროვე, მაღალი დონის არქიტექტურის ნიმუში, რომელიც გამორჩეულ ადგილზე მდებარეობს. კომპლექსი ქალაქის განვითარებაში მნიშვნელოვან წვლილს შეიტანს და ადგილობრივ მცხოვრებლებს დასაქმების საშუალებას მისცემს. პირველი ფაზის მშენებლობა 2019 წელს იგეგმება და დაახლოებით სამ წელიწადს გაგრძელდება. მისი სრული ღირებულება დაახლოებით 73.5 მილიონი დოლარია, ხოლო პროექტირების ფასი – 2,5 მილიონ დოლარზე მეტი იქნება (ფასადების, ლადნშაფტური დიზაინის, ინტერიერების და ირიგაციის პროექტების ჩათვლით).

„სილქ როუდ ჯგუფმა“ „ბათუმი რივიერას“ პროექტის არქიტექტურულ დიზაინსა და ურბანულ დაგეგმარებაზე ისეთ წამყვან კომპანიასთან იმუშავა, როგორიც არის “Chapman Taylor”-ი.

პროექტის კონცეფცია და იერსახე „სილქ როუდ ჯგუფისთვის“ თავიდანვე მნიშვნელოვანი ეტაპი იყო. სწორედ ამიტომ ჩატარდა ტენდერი, რომელშიც 25-მა საერთაშორისო კომპანიამ მიიღო მონაწილეობა. შედეგად, სამუშაოს შესრულება Chapman Taylor-ს დაევალა. კომპანიას გააჩნია 60-წლიანი გამოცდილება და დაჯილდოებულია  250-ზე მეტი საერთაშორისო პრიზით, როგორიც არის: MIPIM Awards-ი, International Property Awards-ი, The Global RLI Awards-ი, ICSC European Shopping Center Awards-ი და კიდევ სხვა მრავალი.

საპროექტო ტერიტორია შედგება „სილქ როუდ ჯგუფის“ საკუთრებაში არსებული 6 ჰექტარი ფართობისგან და სახელმწიფოს საკუთრებაში არსებული 2 ჰექტარი პარკისგან, რომელიც სახელმწიფოს საკუთრებაშივე რჩება. ტერიტორია გახდება ბულვარის შემადგენელი ნაწილი და შეუნარჩუნდება რეკრეაციული ზონის სტატუსი. „სილქ როუდ ჯგუფი“ მხოლოდ მის ლანდშაფტურ დიზაინს შექმნის. ასევე, პროექტის ნაწილად მოიაზრება 20-წლიანი იჯარით აღებული იახტკლუბის ტერიტორია (12.000 მ2).

პროექტის თანახმად, ამ ტერიტორიაზე ეტაპობრივად აშენდება საცხოვრებელი და სასტუმრო შენობები, თანამედროვე სტანდარტების იახტკლუბი, კეთილმოწყობილი პარკი, განსხვავებული კონცეფციის კაზინო – ნათელი, ღია ვიტრაჟებით, ზღვის და იახტკლუბის ხედებით, 2000 სტუმარზე გათვლილი მულტიფუნქციური კონგრესცენტრი, სადაც შესაძლებელი იქნება სპორტული შეჯიბრებების, კონცერტების, გამოფენების და სხვა ღონისძიებების მოწყობა. მცხოვრებლების და მათი სტუმრების ყურადღებას ზღვის ბუნებრივი წყლით შევსებული, ხელოვნური ლაგუნა მიიპყრობს, სადაც მათ მცირე ზომის იახტები  მოემსახურება და გარშემო კაფეები და რესტორნები მიიზიდავთ.

პროექტი „ბათუმი რივიერა“ საქართველოს ეკონომიკის განვითარებაში საკმაოდ მნიშვნელოვან წვლილს შეიტანს. პროექტის პირველი ეტაპის დასრულების შემდეგ აჭარის ბიუჯეტი, ქონების გადასახადის სახით, ყოველწლიურად დამატებით დაახლოებით 1.2 მლნ დოლარს მიიღებს, პროექტის სრულად დამთავრების შემდეგ კი, ქონების გადასახადის შენატანი ყოველწლიურად დაახლოებით 7 მლნ დოლარი იქნება. აღსანიშნავია, რომ საბიუჯეტო შენატანები გაიზრდება საშემოსავლო გადასახადის ზრდის ხარჯზეც. გამომდინარე იქიდან, რომ „ბათუმი რივიერას“ მშენებლობაზე და ექსპლუატაციაში შესვლის შემდგომ 1000 ადამიანზე მეტი დასაქმდება, მათ ხელფასებზე კომპანია საშემოსავლოს სახით წლიურად მინიმუმ 3 მლნ ლარს გადაიხდის. გარდა აჭარის ავტონომიური რესპუბლიკისა, მნიშვნელოვნად შეივსება ქვეყნის ბიუჯეტიც.

მიგვაჩნია, რომ ბათუმში, მაღალ და საშუალოშემოსავლიანი ტურისტული სეგმენტის გაზრდასა და ოთხივე სეზონის განვითარებაზე უნდა დავიწყოთ ზრუნვა.  „ბათუმი რივიერა“ გასართობი და შემეცნებითი ღონისძიებების მიზიდულობის ცენტრი გახდება. ქალაქის პირველი კონვენციის ცენტრი, რომელიც თანამედროვე ტექნიკით აღჭურვილი მრავალფუნქციური სივრცე იქნება, წლის განმავლობაში დიდ აუდიტორიაზე გათვლილ სხვადასხვა კონფერენციას, გამოფენასა და კონცერტს უმასპინძლებს და, შესაბამისად, აქტიური სეზონის ხანგრძლივობას გაზრდის. ეს დამატებით შემოსავალს გულისხმობს როგორც აჭარის ბიუჯეტისთვის, ასევე მცირე და საშუალო ბიზნესისთვის.

გაზაფხულ-ზაფხულში „ბათუმი რივიერა“ იახტების მოყვარულებით დაიტვირთება და მაღალი შემოსავლის მქონე ტურისტებს მოიზიდავს, რომელთა რაოდენობა, სათანადო ინფრასტრუქტურის არარსებობის გამო, საქართველოში, ჯერჯერობით მცირეა. იახტკლუბი 30 მეტრის სიგრძის იახტების მიღებას შეძლებს. აქ იქნება რესტორნები, გასართობი ცენტრი და ზღვის წყლით ავსებული ღია აუზი. რაც შეეხება ზამთარს, ამ პერიოდის აჭარაში გატარება კიდევ უფრო საინტერესო გახდება. „სილქ თაუერის” სახურავზე ვერტმფრენის დასაჯდომი მოედანი მოეწყობა და „ბათუმი რივიერა“ მის მცხოვრებლებს გოდერძისა და მესტიის სამთო-სათხილამურო კურორტების მიმართულებით ფრენებს შესთავაზებს.

6 ჰექტარ ფართობზე გადანაწილებული 6 კოშკი, რომელიც საერთაშორისო ბრენდების საცხოვრებელ ფართობებსა და სასტუმროებს მოიცავს, თანამედროვე ელემენტებისა და ურბანული მწვანე ლანდშაფტისგან შედგება. კომპანია „სილქ როუდ ჯგუფის“ გადაწყვეტილებთ, კომპლექსში შემავალი ყველა შენობის ფასადი და პოდიუმის სახურავები გამწვანდება. Chapman Taylor-ის სპეციალისტების ჩართულობით კი, გათვალისწინებული იქნა კოშკებს შორის მანძილის დაგეგმარება ისე, რომ  ძველ ქალაქსა და ბულვარს შორის სივრცე არ ჩაიკეტოს. აღსანიშნავია, რომ შენობებს შორის დაშორება 80-120 მეტრს შეადგენს.

ძველად ამ ტერიტორიაზე მდებარეობდა ბურუნთაბიეს ციხე-სიმაგრე. შემდგომში მის ნაცვლად საცხოვრებელი სახლები და გემთსარემონტო ქარხანა აშენდა. ასლან აბაშიძის მმართველობის პერიოდში არსებული ტერიტორიაზე მცხოვრებლები ალტერნატიული ფართობებით დააკმაყოფილეს, ხოლო გემთსარემონტო ქარხანა დაიშალა.

გათავისუფლებულ ტერიტორიაზე მულტიფუნქციური შენობის კარკასი აიგო, რომელიც ექსპლუატაციაში არ შესულა და ის ვარდების რევოლუციის შემდგომ დაინგრა. დღეს ეს ტერიტორია, რომელიც „სილქ როუდ ჯგუფმა“ გაამწვანა, არ არის განაშენიანებული. 2018 წელს, „სილქ როუდ ჯგუფმა“ აჭარის არქეოლოგიის ინსტიტუტთან ხელშეკრულება გააფორმა და ჩატარდა სამუშაოები, რომლის შედეგადაც ისტორიული შენობის კვალი არ აღმოჩნდა.

აღნიშნული მიწის „სილქ როუდის“ საკუთრებაში გადმოსვლის შემდეგ პერიოდში, მიმდებარე ტერიტორიაზე, აღიმართა ახალი თანამედროვე მაღლივი შენობები, მათ შორისაა: „პორტა ბათუმი“, „ტექნიკური უნივერსიტეტი“, „კემპინსკის“ დაუმთავრებელი მშენებლობა, ანბანის კოშკი და „რედისონ ბლუ“ ბათუმი. აქედან გამომდინარე, „ბათუმი რივიერას“ მშენებლობა ქალაქის ისტორიულ ნაწილს არანაირ საფრთხეს არ უქმნის. პირიქით, ის ქალაქის ძველ და ახალ ნაწილს ერთმანეთთან დააკავშირებს და მიმდებარე ტერიტორიას ახალ ფუნქციასაც კი შესძენს. აქვე აღვნიშნავთ, რომ „სილქ როუდ ჯგუფის“ პროექტი კანონთან შესაბამისობაშია. ის არ არის მაქსიმალურ ფართობზე ორიენტირებული.

ზოგადად, კომპანია ყოველთვის ცდილობს გარემოსთან მაქსიმალურად მორგებული პროექტების განვითარებას. ამის დასტურია „მწვანე კონცხის“ პროექტი, რომლის ფარგლებშიც მოთხოვნილი კ2 კოეფიციენტი სამჯერ ნაკლებია კანონით მინიჭებულ მაჩვენებელზე.

„სილქ როუდ ჯგუფი“ თავისი საქმიანობის მნიშვნელოვან ნაწილს ქვეყნის კულტურულ მემკვიდრეობაზე ზრუნვას უთმობს. ჯგუფის მთავარი და ერთ-ერთი ყველაზე წარმატებული პროექტი წინანდალის ალექსანდრე ჭავჭავაძის სახლ-მუზეუმის კომპლექსია. ფაქტობრივად, ეს არის პირველი პრეცედენტი კულტურული მემკვიდრეობის ძეგლის კერძო კომპანიისთვის იჯარით გადაცემისა, როდესაც ზედმიწევნით ზუსტად იქნა დაცული ძეგლის ინტერესები. წინანდალი თანამედროვე კულტურის უმნიშვნელოვანესი კერაა, რომელიც ითავსებს ისტორიულ მემკვიდრეობასა და კულტურის თანამედროვე სიახლეებს.

კომპანია პასუხისმგებელია კულტურული მემკვიდრეობის ისეთ გამორჩეულ უძრავ ძეგლებზე, როგორიც არის მელიქ აზარიანცის შენობა თბილისში და ბარატინკის, სიბირიაკოვის, რატიშვილების აგარაკები მახინჯაურსა და მწვანე კონცხზე. აღსანიშნავია ის, რომ აზარიანცის შენობაზე შედგა სარესტავრაციო დეტალური პროექტი და შენობის მძიმე ფიზიკური მდგომარეობიდან გამომდინარე ეტაპობრივად განხორციელდება სარესტავრაციო სამუშაოები. ასევე, კომპანიის ინიციატივით, რატიშვილების სასახლე, რომელსაც არანაირი სტატუსი არ ჰქონია, ამჟამად კულტურული მემკვიდრეობის ძეგლად არის მიჩნეული.

„სილქ როუდ ჯგუფი“ იწყებს მუშაობას აჭარის რეგიონში ორი უმნიშვნელოვანესი ისტორიული შენობის აღდგენა-განახლებაზე, როგორიც არის ბარიანტინსკისა და თითქმის სრულად დანგრეული სიბირიაკოვის აგარაკები. აღსანიშნავია ის გარემოება, რომ სწორედ კომპანიის ინიციატივით შეჩერდა ბარიანტინსკის მიმდებარედ კულტურული მემკვიდრეობის ინდივიდუალურ დამცავ ზონაში მაღალსართულიანი შენობის მშენებლობის პროექტი.

გარდა კულტურულ მემკვიდრეობისა, კომპანია ინიციატორია ქვეყნისთვის არაერთი მნიშვნელოვანი პროექტისა, როგორიც არის წინანდლის ფესტივალი, არაერთი მხატვრის გამოფენა, კონცერტი თუ სხვა.

დასასრულს, დავამატებთ, რომ პროექტი „ბათუმი რივიერა“ მნიშვნელოვანია არა მხოლოდ ინვესტორისთვის, არამედ ბათუმისთვის, აჭარის რეგიონისა და მთლიანად საქართველოსთვის.