Batumelebi | ბათუმში დრამატული თეატრის გახსნას პრემიერი და პრეზიდენტი დაესწრებიან ბათუმში დრამატული თეატრის გახსნას პრემიერი და პრეზიდენტი დაესწრებიან – Batumelebi
RU | GE  

ბათუმში დრამატული თეატრის გახსნას პრემიერი და პრეზიდენტი დაესწრებიან

დღეს, 27 მარტს, ბათუმში ილია ჭავჭავაძის რეაბილიტირებული დრამატული თეატრი გაიხსნება.

აჭარის მთავრობის პრესსამსახურის ინფორმაციით, თეატრის გახსნას პრემიერ-მინისტრი მამუკა ბახტაძე და საქართველოს პრეზიდენტი, სალომე ზურაბიშვილიც დაესწრებიან.

დრამატულ თეატრში გაიმართება სპექტაკლის – „KLDIASHVILI.GE“ პრემიერა დავით კლდიაშვილის ნაწარმოებების მიხედვით, რომლის რეჟისორია ანდრო ენუქიძე.

თეატრის რეაბილიტაცია ფონდმა „ქართუმ“ 2015 წელს დაიწყო. შეცვლილია თეატრის მთავარი სცენის ინტერიერი, რესტავრაცია ჩაუტარდა სკამებს, შეიცვალა იატაკი და გათბობის სისტემა. შენობა მთლიანად ადაპტირებულია შეზღუდული შესაძლებლობის მქონე პირებისთვის. თეთრის ნაცვლად ღია ნაცრისფერით შეცვლილია იარუსების ფერიც.

ბათუმის რეაბილიტირებული დრამატული თეატრი საქართველოს პრემიერ-მინისტრმა, მამუკა ბახტაძემ ერთხელ უკვე გახსნა 2018 წლის 25 ნოემბერს, თუმცა არ შემდგარა გახსნის ოფიციალური ცერემონია, რომელსაც ფართო საზოგადოება დაესწრებოდა – შეხვედრა მედიისთვისაც დახურული იყო. ჟურნალისტები შენობის გარეთ დარჩნენ, მათ თეატრის გახსნის და მსახიობებთან შეხვედრის გაშუქების შესაძლებლობა არ მიეცათ.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.