Batumelebi | ციხეები, რომლებიც სისტემაზე ადამიანების წარმოდგენას ცვლის ციხეები, რომლებიც სისტემაზე ადამიანების წარმოდგენას ცვლის – Batumelebi
RU | GE  

ციხეები, რომლებიც სისტემაზე ადამიანების წარმოდგენას ცვლის

მსოფლიოს სხვადასხვა ქვეყანაში არსებობს ციხეები, რომლებიც სტერეოტიპულად წარმოდგენილი პენიტენციური დაწესებულებებისგან ძალიან განსხვავდება. არის რამდენიმე მაგალითი, სადაც რკინის გისოსებს და დიდ, ნაცრისფერ დერეფნებს ვერ ნახავთ. ეს სხვადასხვა ქვეყანაში მდებარე ჰუმანური ციხეებია, სადაც ცდილობენ, რომ პატიმრებს რაც შეიძლება ნაკლები სტრესი გაჰყვეთ გათავისუფლების შემდეგ ჩაკეტილი სისტემისგან.

 

  • ბასტოის ციხე, ნორვეგია

ბასტოის კუნძულზე მდებარე ეს ციხე ცნობილია საკუთარი მაგალითით – მთელ მსოფლიოს აჩვენებს, როგორი შეიძლება იყოს პენიტენციური სისტემა. პატიმრებს აქვთ მეურნეობა და ბიოლოგიურად სუფთა პროდუქტების დიდი წილი,  რასაც საკვებად იყენებენ, თავად მოჰყავთ. ციხეში 100 პატიმრის განთავსებაა შესაძლებელი. პატიმრები თამაშობენ ტენისს, იღებენ მზის აბაზანებს და გემოვნებით მოწყობილ ხის კოტეჯებში ცხოვრობენ.

ბასტოის ციხე, ნორვეგია

ბასტოის ციხე, ნორვეგია

 

  • ადიველი – შოტლანდია

შოტლანდიის სამხრეთით მდებარე ადიველის ციხე 700 პატიმარს იტევს. ისევე, როგორც გარეთ, ციხეშიც პატიმრები კვირაში 40 საათის განმავლობაში მუშაობენ და სხვადასხვა ტიპის სამუშაოს ასრულებენ. ციხის მიზანია, გათავისუფლების შემდეგ პატიმრებმა მარტივად შეძლონ რეინტეგრაცია და სამსახურის პოვნა. ციხეში იდეალური პირობებია შექმნილი და ყველაფერია იმისთვის, რომ პატიმრებმა თავი ჩაკეტილ სისტემაში არ იგრძნონ.

ადიველის ციხე, შოტლანდია

 

  • ოტაგოს ციხე, ახალი ზელანდია

ციხე პატიმრებს მოსახერხებელ ოთახებს სთავაზობს საკნების ნაცვლად და მათი უნარების განვითარებაზე ზრუნავს. აქ ასწავლიან მაგალითად ელექტროტექნიკის მახასიათებლებს, შეკეთებას, რძის პროდუქტების დამზადებასა და კულინარიას.

ოტაგოს ციხე, ახალი ზელანდია

  • ლეობენის ციხე, ავსტრია

ლეობენის ციხეში არაძალადობრივი დანაშაულისთვის მსჯავრდებულებს ათავსებენ. ციხის ყოველ პატიმარს საკუთარი ოთახი-კამერა აქვს ტელევიზორით, მინი სამზარეულოთი და მხოლოდ მისთვის განკუთვნილი აბაზანა-ტუალეტით. ციხეში ტრენაჟორების დარბაზი, კალათბურთის მოედანი და სუფთა ჰაერზე მოსასვენებელი ადგილებიცაა მოწყობილი.

ლეობენის ციხე, ავსტრია

ლეობენის ციხე, ავსტრია

  • არანჰაუსის ციხე, ესპანეთი

სასჯელაღსრულების ამ ინოვაციურ დაწესებულებაში ცდილობენ პატიმრებს შეუნარჩუნონ ოჯახები და საშუალებას აძლევენ მათ მცირეწლოვან პატარებს იცხოვრონ საპატიმროში მშობლებთან ერთად, სადაც მათთვის კომფორტული გარემოა შექმნილი საბავშვო საწოლებით, კედლებზე დისნეის პერსონაჟებით.

არანჰაუსის ციხე, ესპანეთი

არანჰაუსის ციხე, ესპანეთი

 

  • შამპ-დოლონის ციხე, შვეიცარია

შამპ-დოლონის ციხე ჟენევაშია და ყოველი „საკანი“ სასტუმროს სამადგილიან ნომერს მოგაგონებთ. ოთახებს საკუთარი სველი წერტილებიც აქვთ. ამ შვეიცარული ციხის იდეა იმაში მდგომარეობს, რომ პატიმრებმა თავი საერთო საცხოვრებლის მაცხოვრებლებად, მეზობლებად უნდა იგრძნონ, რომლებიც ერთად გადიან სარეაბილიტაციო პერიოდს.

შამპ-დოლონის ციხე, შვეიცარია

შამპ-დოლონის ციხე, შვეიცარია

 

  • ფულსბუტელის ციხე, გერმანია

ციხე ჰამბურგშია და აქ სასჯელს მრავალწელმისჯილები იხდიან. პატიმრებისთვის განკუთვნილი ოთახები ხის სადა ავეჯითაა გაწყობილი, საწოლით, მაგიდით, დივნითა და სამუშაო მაგიდით. ოთახშივე აქვთ სარეცხი მანქანები. პატიმრები ოთახში მარტო ცხოვრობენ.

ფულსბუტელის ციხე, გერმანია

 

  • სოლენტუნის ციხე, შვედეთი

ამ საპატიმროში ერთადგილიანი ,,საკნები“ აქვთ პატიმრებს თანამედროვე, მინიმალისტური ავეჯითა და სველი წერტილებით. მსჯავრდებულებს სატრენაჟორო დარბაზიც აქვთ და ღია სამზარეულო, ასევე ცალკე მოსასვენებელი ოთახიც დივნითა და ტელევიზორით.

სოლენტუნის ციხე, შვედეთი

სოლენტუნის ციხე, შვედეთი

 

  • სებუს ციხე, ფილიპინები

სებუს ციხეში მართალია არ არის ზემოთ ჩამოთვლილი ციხეების მსგავსი კომფორტი, თუმცა აქ დიდ ყურადღებას უთმობენ პატიმართა დასვენებასა და ხელოვნების საშუალებით განტვირთვას. მსჯავრდებულებს სებუს ციხეში აქვთ სიმღერისა და ცეკვის გუნდები, სხვადასხვა პროგრამით ისინი პერიოდულად კონცერტებსაც მართავენ აუდიტორიისთვის და ავტოგრაფებსაც არიგებენ.

სებუს ციხე, ფილიპინები

 

  • სან-პედროს ციხე, ბოლივია

სან-პედროს ციხეც არ გამოირჩევა ფუფუნებითა და კომფორტით, მაგრამ ერთ-ერთი უცნაური ციხე მართლაცაა მთელ მსოფლიოში. ციხის აქ მყოფი საზოგადოება თვითმარქვია ლიდერებისგან შედგება, ციხე მიკრორაიონებადაა დაყოფილი, აქვე ფუნქციონირებს კაფე. პატიმრები აქ ოჯახებთან ერთად ცხოვრობენ. სან-პედროს ციხე პატარა ქალაქს მოგაგონებთ.

სან-პედროს ციხე, ბოლივია

წყარო


 

მასალა მომზადებულია პროექტის – „ყოფილი პატიმრების, პატიმართა ოჯახებისა და პრობაციონერების მხარდაჭერის პროგრამა“  ფარგლებში.
პროექტს ახორციელებს ა(ა)იპ „დემოკრატიის ინსტიტუტი“ და დაფინანსებულია ევროკავშირის მიერ.
მასალაში გამოთქმული მოსაზრებები ავტორისეულია და შესაძლოა არ გამოხატავდეს დონორი ორგანიზაციის თვალსაზრისს.

ნეტგაზეთის მასალების სხვა გამოცემებში გადაბეჭდვის წესი
ავტორი
თამარ ნერგაძე არის "ბათუმელების" რეპორტიორი 2017 წლის ოქტომბრიდან. ტელ.: 568 81 41 75 / E-mail.: tamarnergadze123@gmail.com