საინიციატივო ჯგუფის „დაიცავი ძველი ბათუმის“ წევრების ბათუმის მერისადმი მიმართვასთან დაკავშირებით, დღეს აჭარის მთავრობის თავმჯდომარემ, თორნიკე რიჟვაძემ კომენტარი გააკეთა. მან თქვა, რომ მთავრობა ძეგლებთან მიმართებაში თანმიმდევრულია და კანონის შესაბამისად მოქმედებს. მისივე თქმით, ის არ აპირებს „ამ ტიპის შემოტევებს შედეგად შეცვალოს გადაწყვეტილება“.
„ყველა ის უწყება, არის ერთიანი მმართველობის ქვეშ, რა თქმა უნდა, თავისი მანდატით და კომპეტენციით იღებს გადაწყვეტილებებს, მათ შორის თვითმმართველობა, ზონალური საბჭო და ყველა ის უწყება, რომელიც ერთიან მმართველობაში შემოდის. ამავე დროს, მე მოვუწოდებ, რომ კონკრეტული ფაქტებით ვისაუბროთ, სად ხდება კორპუსების ჩადგმა, სად ხდება ძეგლებთან დაკავშირებით არათანმიმდევრული უკანონო გადაწყვეტილებები მიღებული და, ბუნებრივია, დავინტერესდები. თუმცა მე რაც მაქვს მოკვლეული ძეგლებთან დაკავშირებით, არც ერთი კანონსაწინააღმდეგო გადაწყვეტილება არ არის მიღებული, განსაკუთრებით კი ძეგლების ნგრევასთან დაკავშირებით. ყველანი ნახავთ, რომ წელს და მომდევნო წელს, მათ შორის კულტურული მემკვიდრეობის კუთხით, იქნება ძალიან მნიშვნელოვანი ღონისძიებები გატარებული და მეტი ძეგლის რესტავრაცია განხორციელდება. მაგრამ, ამავე დროს, ჩვენ ვმოქმედებთ ძალიან მარტივი პრინციპით – ძაღლი ყეფს ქარავანი მიდის და არ ვაპირებთ, რომ ამ ტიპის შემოტევების შედეგად ჩვენი გადაწყვეტილებები შევცვალოთ. ყველა გადაწყვეტილება იქნება კანონის შესაბამისი ამ ქალაქის ინტერესებიდან გამომდინარე“, – განაცხადა თორნიკე რიჟვაძემ [ სტილი დაცულია.]
https://www.youtube.com/watch?v=4HH7-rnis94&fbclid=IwAR1lXUvmb9-CSEp38mx8a1MJw3SnuFhj5X67pgOIfIK_FwI36TuN8dUdC_E
თორნიკე რიჟვაძე დღეს, 21 თებერვალს, იმყოფებოდა ბათუმში, ჯინჭარაძის ქუჩაზე, გაზის შედეგად აფეთქებული სახლის ადგილზე. სწორედ აქ ჰკითხა აჭარის ტელევიზიის ჟურნალისტმა, ახდენს თუ არა თვითმმართველობებზე ზეწოლას აჭარის მთავრობის თავმჯდომარე, რაზეც საუბარია „დაიცავი ძველი ბათუმის“ მიერ დღეს გავრცელებულ ღია წერილში.
„დაიცავი ძველი ბათუმის“ წევრებმა დღეს ბათუმის მერს ღია წერილით მიმართეს, სადაც მას მოუწოდეს, არ გასცეს ნებართვა ძველ ბათუმში ერთსართულიანი სახლების დემონტაჟის ხარჯზე აშენდეს ახალი მრავალბინიანი სახლები.
“დაიცავი ძველი ბათუმი” ლაშა კომახიძეს: გამოაცხადეთ მორატორიუმი
