ბინა ბათუმში 154 დევნილი ოჯახისთვის

დღეს, 16 თებერვალს, ბათუმში, ლეონიძის ქუჩაზე, ახალაშენებულ კორპუსებში ბინა 154 დევნილ ოჯახს გადაეცა. ამავე კორპუსებში საცხოვრებელ ფართს სოფელ წაბლანაში სტიქიური მოვლენების შედეგად დაზარალებული 208 ეკომიგრანტი ოჯახიც მიიღებს. ბათუმში დევნილი ოჯახებისთვის გადაცემული 154 ბინიდან 38 ერთოთახიანია, 96-ოროთახიანი, 15-სამოთახიანი, 5 კი ოთხოთახიანი. ამის შესახებ ინფორმაციას აჭარის მთავრობა ავრცელებს.

ბათუმში, ლეონიძის ქუჩაზე, ორი 16-სართულიანი კორპუსი საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროსა და აჭარის მთავრობის ერთობლივი პროექტის ფარგლებში აშენდა. სამინისტრო თავისი ბიუჯეტიდან ამ კორპუსების ასაშენებლად 9 000 000 ლარზე მეტი ჰქონდა გამოყოფილი. აჭარის მთავრობამ კი, ხულოს მუნიციპალიტეტის სოფელ წაბლანაში, 1989 წელს, სტიქიის შედეგად დაზარალებული ოჯახების განსახლების მიზნით, ბათუმში 5000 კვ.მ მიწის ნაკვეთი და 1 550 000 ლარი გამოყო.

სტიქიით დაზარალებულებისა და დევნილებისთვის ბინები სწორედ ამ ტერიტორიაზე აშენდა.

დევნილებისთვის ბინების გადაცემის ცერემონიალზე დასასწრებად ბათუმში იმყოფებოდა დევნილთა სამინისტროს მინისტრის მოადგილე გრიგოლ გიორგაძე. სწორედ მან და აჭარის მთავრობის თავმჯდომარემ, თორნიკე რიჟვაძემ გადასცეს დღეს დევნილ ოჯახებს ბინების გასაღებები.

რაც შეეხება სოფელ წაბლანის მოსახლეობას, ისინი უკვე ცხოვრობენ ამ კორპუსებში.

ლეონიძის ქუჩაზე ორი კორპუსი დევნილებისა და ეკომიგრანტებისთვის სახელმწიფო დაკვეთით კომპანია „გ2 ბილდინგმა“ ააშენა.