ბათუმის მერია 3 მუნიციპალურ ავტობუსს ოზურგეთს გადასცემს


ბათუმის მერია თავის ბალანსზე არსებულ  სამ მუნიციპალურ ავტობუსს სახელმწიფოს უსასყიდლოდ, სახელმწიფო კი, ოზურგეთის მუნიციპალიტეტს გადასცემს.

შესაბამისი თხოვნით ბათუმის მერიას სახელმწიფო ქონების ეროვნულმა სააგენტომ 2019 წლის 9 იანვარს მიმართა. დღეს, 31 იანვარს კი, ბათუმის მერიამ ავტობუსების გადაცემაზე თანხმობა ქალაქის საკრებულოსგან მიიღო.

ბათუმის მერია სახელმწიფოს, შემდგომში ოზურგეთისთვის გადასაცემად სამ „ზონდას“ მარკის ავტობუსს გადასცემს. ამ ავტობუსებს პერიოდული ტექნიკური დათვალიერება გავლილი არ აქვს.

 

ბათუმის მერიას ხუთი ავტობუსი 2018 წლის ნოემბერშიც მოსთხოვეს ქალაქ ფოთისთვის გადასაცემად. როგორც ფოთის, ასევე, ოზურგეთის მერი ქონების ეროვნულ სააგენტოში გაგზავნილ წერილში მიუთითებენ, რომ „ავტობუსების რაოდენობა არ არის საკმარისი მოსახლეობის მომსახურებისთვის, რაც ხშირ შემთხვევაში იწვევს მათ სამართლიან უკმაყოფილებას“. ორივე მერი მიუთითებს, ასევე, რომ მათ ახალი ავტობუსების შესაძენად არ აქვთ ფინანსური რესურსი.

ამ თემაზე:

ბათუმის მერიის 5 მუნიციპალურ ავტობუსს ფოთის მერიას გადასცემენ

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com