Batumelebi | ჩაბნელებული ქუჩები ბათუმში – რამდენად მასშტაბურია პრობლემა ჩაბნელებული ქუჩები ბათუმში – რამდენად მასშტაბურია პრობლემა – Batumelebi
RU | GE  

ჩაბნელებული ქუჩები ბათუმში – რამდენად მასშტაბურია პრობლემა

ბათუმში რამდენიმე ქუჩაზე ღამის განათება არ მუშაობს. განათება გამორთულია, შესაბამისად, სიბნელეში უწევთ გადაადგილება მოქალაქეებს შემდეგ ქუჩებზე: ლადო ასათიანის, ბაგრატიონის, მელიქიშვილის, რურუას, ჩოლოყაშვილის, ტბეთის, პარიზის კომუნას და კიდევ რამდენიმე ქუჩაზე. დაახლოებით ათი ჩაბნელებული ქუჩის შესახებ აცნობეს „ბათუმელებს“ მოქალაქეებმა.

მოქალაქე დავით ყულეჯიშვილი წერს, რომ თამარის დასახლებაში, ტბეთის ქუჩაზე, დიდი ხანია გამორთულია ღამის განათება.

კიდევ ერთი მოქალაქე, ია ბასილაძე წერს, რომ ღამის განათება დიდი ხანია არ მუშაობს სულაბერიძისა და ჩოლოყაშვილის ქუჩაზე.

„გაურკვევლობაში ვარ. ასეთივე მდგომარეობაა დიმიტრი თავდადებულისა და ბესიკის კვეთაშიც. როდემდე უნდა ვიყოთ სიბნელეში“, – წერს ის „ბათუმელების“ ფეისბუქგვერდზე.

მოქალაქეები მიუთითებენ, რომ ჩაბნელებულ ქუჩებზე საერთოდ გამორთულია შუქნიშანი, რაც განსაკუთრებით ფეხით მოსიარულეებისთვის ქმნის რისკებს.

ჩაბნელებული ქუჩები არის სახიფათო და შესაბამისად, „კარგი გარემო“ დამნაშავეებისთვის. კიდევ ერთი საკითხი, რაც მოქალაქეებს აწუხებთ, ეს არის კრიმინალის გაზრდის მაღალი რისკი.

მოქალაქეების თქმით, მათ მერიასაც მიმართეს ამ საკითხზე, მაგრამ ღამის განათებების გამორთვის მიზეზთან დაკავშირებით ინფორმაცია ვერ მიიღეს.

„ბათუმელები“  დაუკავშირდა ბათუმის მერიის საქალაქო ინფრასტრუქტურისა და კეთილმოწყობის სამსახურს. როგორც ამ სამსახურში განაცხადეს, აღნიშნულ ქუჩებზე ღამის განათებების გათიშვის მიზეზი „ტექნიკური ხარვეზია. მოკვლეულია ყველა პრობლემა და უახლოეს ერთ კვირაში განათება აღდგება“.

 

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com