მალხაზ მაჩალიკაშვილმა საკონსტიტუციო სასამართლოს მიმართა. ის სარჩელით დაზარალებულის სტატუსის მიუღებლობას აპროტესტებს, რაც მას ამ დრომდე არ აქვს. სარჩელის კიდევ ერთი ავტორი ქობულეთის მუსლიმური პანსიონია, რომელიც ასევე არ მიიჩნია სახელმწიფომ დაზარალებულად – სასამართლოს არაერთი გადაწყვეტილების მიუხედავად, ქობულეთში პანსიონი ამ დრომდე დაკეტილია. მოსარჩელეების ინტერესებს სასამართლოში „ადამიანის უფლებების სწავლების და მონიტორიგის ცენტრი“ დაიცავს.
მოსარჩელეები არაკონსტიტუციურად მიიჩნევენ იმ საკანონმდებლო ნორმებს, რომლებითაც პირს დაზარალებულის ან დაზარალებული პირის უფლებამონაცვლის სტატუსს ანიჭებენ.
„მეორე მხრივ კი, სტატუსის მინიჭების შემთხვევაშიც სისხლის სამართლის პროცესში დაზარალებულის მონაწილეობას არსებითად ზღუდავს… დაზარალებულის სტატუსის მინიჭებასთან დაკავშირებით, მოქმედი კანონმდებლობა იძლევა თვითნებური განმარტების შესაძლებლობას, რასაც პრაქტიკაში, პროკურორი დაზარალებულის სტატუსის მინიჭებაზე დაუსაბუთებელი უარის თქმის საფუძვლად იყენებს ხოლმე. შესაბამისად, დაზარალებულისთვის გაურკვეველი რჩება სტატუსზე უარის თქმის მიზეზი,“ – აღნიშნულია „ადამიანის უფლებების და სწავლების მონიტორინგის“ მიერ გავრცელებულ ინფორმაციაში.
მალხაზ მაჩალიკაშვილის შვილი – თემირლან მაჩალიკაშვილი 2017 წლის 26 დეკემბერს, პანკისის ხეობაში ჩატარებული სპეცოპერაციის დროს საკუთარ სახლში შუბლის არეში დაჭრეს. ის 2018 წლის 10 იანვარს საავადმყოფოში გარდაიცვალა. მალხაზ მაჩალიკაშვილი ხორავას ქუჩაზე მოკლული არასრულწლოვნის მამასთან, ზაზა სარალიძესთან ერთად მართავს აქციებს და დამნაშავის დასჯას ითხოვს.
დაზარალებულის სტატუსის მინიჭების კუთხით საკონსტიტუციო სასამართლომ გადაწყვეტილება გასული წლის 14 დეკემბერს მიიღო. ამ შემთხვევაში სასამართლომ დაადგინა, რომ მოქალაქეს შეუძლია პროკურორის გადაწყვეტილება გაასაჩივროს სასამართლოში, როცა ის დაზარალებულის სტატუსის მინიჭებაზე უარს ეტყვის.
