Batumelebi | პაატა იმნაძე: საქართველოში ამჟამად სამი ვირუსი ცირკულირებს პაატა იმნაძე: საქართველოში ამჟამად სამი ვირუსი ცირკულირებს – Batumelebi
RU | GE  

პაატა იმნაძე: საქართველოში ამჟამად სამი ვირუსი ცირკულირებს

დაავადებათა კონტროლის სამეცნიერო საბჭოს თავმჯდომარის, პაატა იმნაძის განცხადებით, საქართველოში ჯერჯერობით გრიპის ვირუსის შემთხვევები არ დაფიქსირებულა – ამ თემაზე მან თბილისში გამართულ პრესკონფერენციაზე ისაუბრა.

პაატა იმნაძის განცხადებით, ბოლო კვირების განმავლობაში საქართველოში ძირითადად ცირკულირებს სამი ვირუსი, რომელთაც გრიპისმაგვარი სიმპტომები ახასიათებს. ეს ვირუსებია: რინოვირუსი, რომლის დროსაც ადამიანს აღენიშნება სურდო; პარავირუსი, რამაც შეიძლება ბავშვებში ცრუ კრუპის მოვლენები გამოიწვიოს და მეტაპნევმოვირუსი, რომელიც გარკვეულ შემთხვევებში რთულად მიმდინარეობს.

„არის 200-მდე ვირუსი, რომელსაც შეუძლია გაციებას რასაც ვეძახით, ის გამოიწვიოს. აქედან 20-მდე ვირუსი იწვევს გრიპისმაგვარ დაავადებებს ყველაზე ხშირად. ამ ვირუსებზე სულ არის მეთვალყურეობა ქვეყანაში. ამჟამად ეს სამი ვირუსია, „გაციების ვირუსებში“, ასე ვთქვათ, წამყვანი“  – აღნიშნა პაატა იმნაძემ.

მისივე განცხადებით, რეკომენდაციები ვირუსებთან დაკავშირებით, უცვლელია:

„გრიპი იქნება თუ გაციება, რაც უფრო ნაკლებად მივა ასეთი ადამიანი სამსახურში, მით უფრო ნაკლებად გაავრცელებს ვირუსს.

როცა ცივა, ვირუსი გარემოში ცოცხალი რჩება 7 საათის განმავლობაში. ხველის და ცემინების დროს უნდა მივიფაროთ [პირზე] ერთჯერადი ხელსახოცი. მაგალითად, ვიღაცამ დაახველა, დააცემინა, მოხვდა მაგიდაზე [ვირუსი], მერე სხვამ ამას ხელი დაადო, მოისვა ცხვირზე ან თვალზე … ასე გადადის ძირითადად როგორც გრიპის ვირუსი, ისე გაციების ვირუსი. ამიტომ მეორე რეკომენდაცია არის ხელების ხშირად დაბანა. გარეთ თუ ვართ და ხელის დაბანას ვერ ვახერხებთ, არის ხელის დასამუშავებელი სითხეები ან სველი ხელსახოცები, რომლებიც გარკვეულ მადეზინფექცირებელ საშუალებებს შეიცავენ. თავდაცვის ერთ-ერთი საშუალება არის ვაქცინაცია“.

პაატა იმნაძემ ასევე აღნიშნა, რომ გრიპის ვირუსის გააქტიურება დაახლოებით 1-2 კვირაშია მოსალოდნელი, თუმცა ეს დამოკიდებულია ამინდზეც:

„რაც უფრო მეტი მზიანი დღე იქნება, მით უფრო ნაკლები იქნება ყველანაირი ვირუსი, მათ შორის გრიპის ვირუსი. თებერვლამდე არ ველოდებით გრიპის შემთხვევების მატებას. ჯერ ევროპის უმრავლეს ქვეყნებში, ფინეთში და ნორვეგიაშიც არ დაწყებულა გრიპის აქტიური სეზონი,“ – განაცხადა მან.

 

 

 

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com