ბავშვი, რომელიც ქედის მუნიციპალიტეტის სოფელ დოლოგანში ერთი საათის წინ კარიერის აფეთქების შედეგად დაიღუპა, თავისი ბიძის ეზოში თამაშობდა. ამის შესახებ „ბათუმელებს“ ქედის მერის მოადგილემ როლანდ ბერიძემ უთხრა. მისივე ინფორმაციით, მძღოლი, რომელიც კარიერზე მუშაობდა, ადგილიდან მიიმალა.
მერის მოადგილე ამბობს, რომ ადგილზე იმყოფება პოლიცია, რომელიც მიმალულ მძღოლს ეძებს.
“ბიჭი ბიძის ეზოში თამაშობდა, როცა კარიერზე აფეთქება მოხდა და იქიდან ასხლეტილმა ქვამ, ბავშვი ადგილზე მოკლა. ის კაცი, ვინც ააფეთქა, გაქცეულია და პოლიცია ეძებს. მთელი სტრუქტურაა ჩართული,” – უთხრა “ბათუმელებს” ქედის მერის მოადგილემ როლანდ ბერიძემ.
მერის მოადგილე, ისე როგორც მერის წარმომადგენელი სოფელ დოლოგანში მალხაზ საფარიძე ამბობს, რომ მათთვის უცნობია, რომელ კომპანიას ჰქონდა შესაბამისი ლიცენზია და რომელი კომპანია მუშაობდა კარიერზე დოლოგანში.
მალხაზ საფარიძის თქმით, სოფელში კლდის დაშლის სამუშაოები 3-4 წლის წინ დაიწყო და რამდენჯერმე შეიცვალა კომპანია, რომელიც სამუშაოებს აწარმოებდა. „რაც ვიცი, კომპანიის უფროსი გოჩა ბაკურიძე იყო. მერე შეიცვალა რაღაცეები. ზუსტად არ ვიცი ახლა ვის ეკუთვნის ეს კომპანია“.
მერის მოადგილის თქმით, მთელი სოფელი ადგილზეა შეკრებილი.
შემთხვევა სოფელ დოლოგანში, ჭინკაძეების უბანში მოხდა.
შემთხვევის ადგილას ამ დრომდე ხალხია შეკრებილი
