მთავარი,სიახლეები

როგორი იქნება ადაპტირებული ბულვარი 2019 წელს [ფოტო]

20.10.2018 • 4130
როგორი იქნება ადაპტირებული ბულვარი 2019 წელს [ფოტო]

2019 წელს „ბათუმის ბულვარი“ შშმ პირებისთვის პლაჟზე გადასასვლელი ბილიკის მოწყობას აპირებს. ზღვაზე გადასასვლელი ბილიკების გარდა დაგეგმილია სხვა ადაპტირებული ინფრასტრუქტურის მოწყობაც. დღეს, 20 ოქტომბერს, ბულვარის ადმინისტრაციამ პროექტის პრეზენტაცია გამართა.

ზღვაზე გადასასვლელი ბილიკის ესკიზი.

„ჩვენი პლაჟი ქვიანი და საკმაოდ რთული სამოძრაოა, ამიტომ გადავწყვიტეთ, გადასასვლელი გავამარტივოთ“, – აღნიშნეს პრეზენტაციაზე.

ადაპტირებული საშხაპე პლაჟზე – პროექტის მიხედვით

წარმოდგენილი იყო ასევე საბავშვო ატრაქციონების ესკიზი.

პროექტის მიხედვით, ბულვარში უნდა განთავსდეს საბავშვო ადაპტირებული ატრაქციონები. აქცენტი გაკეთდა ქვიშის სათამაშო მაგიდაზე.

პრეზენტაციისას წარმოდგენილი იყო ორი ქვეყნის – საბერძნეთისა და  თურქეთის საკურორტო ქალაქების ზღვაში შესასვლელი ადაპტირებული პანდუსის, გადასასვლელი ბილიკების, საშხაპეების, გასახდელებისა და საპირფარეშოების მაგალითები.

ბულვარის ადმინისტრაციის წარმომადგენელმა თქვა, რომ  პროექტის მიხედვით ბულვარში უნდა გაკეთდეს ევროსტანდარტებზე მორგებული სამი ადაპტირებული საპირფარეშო, სადაც განთავსდება ქალების, კაცების, ბავშვების განყოფილება და შშმ პირებზე ადაპტირებული ზონა.

პრეზენტაციას ესწრებოდნენ შშმ პირებიც

„ბათუმის ბულვარის“ დირექტორის, ირაკლი ჯინჭარაძის განცხადებით, უკვე შერჩეულია კონტრაქტორი კომპანია – შპს „საბა“, რომელიც ადაპტირებული ბულვარის პროექტზე იმუშავებს. „ჩვენ გავაგრძელებთ ურთიერთობას შშმ პირებთან და ისინი გამოყოფენ რამდენიმე ადამიანს, რომლებიც ჩაერთვებიან პროექტირებაში და ვიქნებით შედეგზე ორიენტირებული“, – თქვა ირაკლი ჯინჭარაძემ.

როგორც ბულვარის ადმინისტრაციის პრესსამსახურში გვითხრეს, პროექტის ბიუჯეტი ჯერ დაზუსტებული არ არის: „ახლა დაიწყებს თანხების დათვლას საპროექტო და შემდეგ უკვე ზუსტად გვეცოდინება ბიუჯეტი“.

პრეზენტაციის შემდეგ აჩვენეს ბრიტანული ფილმი  „ჩემი მარცხენა ფეხი“.

გადაბეჭდვის წესი


ასევე: