ქობულეთის სოფელ ციხისძირში ე.წ. უშაკოვის აგარაკის, ქედის სოფელ ზვარეს ჯამესა და ბათუმში, კ. გამსახურდიას N36-ში მდებარე სახლის რეაბილიტაციის მიზნით, აჭარის კულტურული მემკვიდრეობის დაცვის სააგენტომ ტენდერი გამოაცხადა, თანხა 82 ათასი ლარია.
ავარიულ მდგომარეობაში მყოფი კულტურული მემკვიდრეობის ძეგლების სარეაბილიტაციო სამუშაოები უნდა განხორციელდეს იმ პროექტების შესაბამისად, რომლებიც სააგენტოს დაკვეთით მომზადდა. პროექტების მიხედვით სამივე ძეგლზე ძირითადად მოეწყობა ახალი სახურავი, ასევე, ჩატარდება სხვადასხვა სამუშაო.
ტენდერში წინადადებების მიღება 2018 წლის 24 ოქტომბერს დაიწყება და 29 ოქტომბერს დასრულდება.
ქობულეთში, სოფელ ციხისძირში, ისტორიულ სახლში ილია ევანის ოჯახი ცხოვრობს. ილია ევანი გასულ წელს აცხადებდა, რომ სახლი ავარიულ მდგომარეობაშია და სახურავი თუ არ გამოიცვალა, მე-19 საუკუნის ბოლოს აგებული სახლი ზამთარს ვეღარ გაუძლებდა.
უშაკოვის აგარაკს ძეგლის სტატუსი 2016 წელს მიენიჭა.
ამ ტენდერის ფარგლებში გადაიხურება ზვარეს ჯამეს შენობა:
ფოტო პროექტიდან
სხვადასხვა სარეაბილიტაციო სამუშაოები ჩაუტარდება ბათუმში, კ. გამსახურდიას N36-ში მდებარე სახლსაც:
ფოტო პროექტიდან
