დღეს, 2 ოქტომბერს, ბათუმში 43-ე საჭადრაკო ოლიმპიადის დახურვის ცერემონიალის სპეციალური სტუმარი, ჩილელი კომპოზიტორი, მომღერალი და არტისტი იუგა ეწვევა – ინფორმაციას ამის შესახებ მსოფლიო საჭადრაკო ოლიმპიადის საორგანიზაციო კომიტეტი ავრცელებს.
„იუგა მუსიკალურ სამყაროში 2008 წელს გამოჩნდა და ყურადღება მიიპყრო ჟანრის მრავალფეროვნებით – მღერის ბლუზს, კლასიკურ როკს, ოპერას, შანსონსა და პოპს. გამოშვებული აქვს 3 CD, ავტორია რამდენიმე თეატრალური შოუსი, რომელთაგან გამორჩეული იყო ედიტ პიაფისადმი მიძღვნილი სანახაობა, რომელმაც დიდი წარმატება ჰპოვა არგენტინასა და ურუგვაიში – იუგა ედიტ პიაფად გარდაისახა.
დღესღეობით იუგას ახალი გატაცება აქვს – ჭადრაკი და მუსიკა. პირველ ასეთ კომპოზიციას „ო, კაპაბლანკა“ ეწოდა, რომელიც კომპოზიტორმა 2018 წლის აგვისტოში გამოუშვა. სწორედ ამ ახალი კომპოზიციითა და პერფორმანსით ეწვევა იუგა 43-ე საჭადრაკო ოლიმპიადას. როგორც ჩილელი არტისტი აცხადებს, ეს საქართველოსა და ბათუმის ოლიმპიადისადმი, და, ზოგადად, ჭადრაკისადმი განკუთვნილი საჩუქარია,“ – აღნიშნულია ინფორმაციაში.
იუგა უსასყიდლოდ ჩამოდის საქართველოში და ჰონორარის გარეშე მიიღებს მონაწილეობას 43-ე საჭადრაკო ოლიმპიადის დახურვის ცერემონიალში, რომელიც 5 ოქტომბერს ბათუმის სახელმწიფო მუსიკალურ ცენტრში, 20 საათზე გაიმართება.
