კულტურული მემკვიდრეობის ევროპული წლის ფარგლებში, აჭარის კულტურული მემკვიდრეობის დაცვის სააგენტოს ორგანიზებითა და განათლების, კულტურისა და სპორტის სამინისტროს მხარდაჭერით, 2018 წლის 30 სექტემბერს 19:00 საათზე, ქ. ბათუმში, გ. მაზნიაშვილის N48-ში გაიმართება ღონისძიება „ბათუმური ეზო“. პროექტის მიზანია, ძველი ბათუმური ეზოების პოპულარიზაცია, მათი ყოფითი როლისა და ფუნქციის გაზრდა.
ღონისძიების ფარგლებში წარმოდგენილი იქნება თეატრალური პერფორმანსი, რომელიც გააცოცხლებს ძველი ბათუმური ეზოების ისტორიასა და იქ მცხოვრებთა ყოველდღიურ ყოფას. მოწვეული ბათუმელი ისტორიკოსები მოგვითხრობენ მე-19 საუკუნის ბათუმის შესახებ, ბათუმური ეზოების მნიშვნელობაზე, მოსახლეობის ურთიერთდამოკიდებულებებსა და ყოფით ტრადიციებზე მათ ყოველდღიურ ცხოვრებაში.
ბათუმის ხელოვნების უნივერსიტეტის სტუდენტები გამართავენ პრეზენტაციას, სადაც ასახული იქნება მათი იდეები და პროექტები ძველი ბათუმური ეზოს სამომავლო განვითარების კუთხით.
ძველი ბათუმის ფოტოებით გაფორმდება ეზოში არსებული საცხოვრებელი სახლის ერთი კედელი; მოეწყობა ადგილობრივი მხატვრების ნამუშევართა გამოფენა-გაყიდვა.
ღონისძიებას გააფორმებს მუსიკალური ბენდი.
