Batumelebi | როგორი მიკროავტობუსები იმოძრავებენ ბათუმში – კომისია შეფასებას 10 აგვისტოდან დაიწყებს  როგორი მიკროავტობუსები იმოძრავებენ ბათუმში – კომისია შეფასებას 10 აგვისტოდან დაიწყებს  – Batumelebi

როგორი მიკროავტობუსები იმოძრავებენ ბათუმში – კომისია შეფასებას 10 აგვისტოდან დაიწყებს 

ბათუმის მერიაში შექმნილი საკონკურსო კომისია იმ მიკროავტობუსების ტექნიკურ შემოწმებას, რომლებმაც ქალაქში სამარშრუტო ხაზებზე უნდა იმოძრაონ, 10 აგვისტოდან დაიწყებს.

სამარშრუტო ხაზებზე მგზავრთა გადაყვანის ნებართვის მოსაპოვებლად გამოცხადებულ კონკურსში განცხადებების მიღება დასრულებულია. ბათუმის მერიის ინფორმაციით, კონკურსში 6 კომპანია მონაწილეობს. აქედან ოთხს  შესაბამისი ნებართვები აქვთ და მათი მიკროავტობუსები დღემდე მოძრაობენ ქალაქში.

ახალი კრიტერიუმები, რასაც ბათუმში სამარშრუტო ხაზებზე მოძრავი მიკროავტობუსები უნდა აკმაყოფილებდნენ, ბათუმის საკრებულომ  დაამტკიცა და მიმდინარე წლის 6 ივლისიდან შევიდა ძალაში.

როგორც მერიაში განმარტავენ, ახალ კრიტერიუმებს კონკურსში გამარჯვებული ნებართვის მაძიებელთა მიკროავტობუსები უნდა აკმაყოფილებდეს. ნებართვის მოპოვება კი სწორედ საკონკურსო შეფასებაზე იქნება დამოკიდებული – ვისი მიკროავტობუსებიც უფრო მეტად დააკმაყოფილებს ამ კრიტერიუმებს, მეტ ქულასაც ის მიიღებს.

ნებართვის მაძიებელთა მიერ საკონკურსო კომისიაში წარდგენილი მიკროავტობუსების მატერიალურ-ტექნიკური მდგომარეობის შეფასება მოხდება ბათუმში, გოგოლის ქ. N1-ში [„მეტროს“ ავტოსადგურის ტერიტორია], 2018 წლის 10 აგვისტოდან 17 აგვისტოს ჩათვლით, 10:00 სთ-დან 17:00 სთ-მდე.

კრიტერიუმები, რომლებსაც უნდა აკმაყოფილებდნენ კონკურსში წარდგენილი მიკროავტობუსები და შესაბამისი ქულები:

ბათუმის საკრებულოს გადაწყვეტილებით, სანებართვო მოსაკრებელი ერთ სამარშრუტო ხაზზე, თვეში 5 ლარის ნაცვლად 50 ლარი იქნება. ერთ სამარშრუტო ხაზზე გაიცემა ერთი ნებართვა.

ბათუმში მიკროავტობუსებით მგზავრთა გადაყვანაზე კონკურსი იმ სამარშრუტო ხაზებზეა გამოცხადებული, რომლებზეც მოძრაობის ახალი სქემები და ინტერვალები საკრებულომ დაამტკიცა.

ეს სამარშრუტო ხაზებია: № 20, 21, 24, 25, 28, 29, 30, 31, 32, 33, 34, 36, 39, 40, 42, 44, 45, 46, 47, 49, 52, 56.

კონკურსის შემდეგ ქალაქში აღარ იმოძრავებს სამარშრუტო მიკროავტობუსები, მაგალითად, შემდეგი ნომრებით: 22, 26, 35, 51, 55.

ქალაქში არსებულ სამარშრუტო ხაზებზე მოძრაობის ახალი სქემები კი შეგიძლიათ იხილოთ ბმულზე.

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com