აჭარაში 105 კილომეტრამდე შიდა სასოფლო ბეტონის გზა დაიგება – დაიხარჯება 5,5 მილიონი [ფოტო]

საგზაო ინფრასტრუქტურის განვითარებაში ერთ-ერთი ძირითადი პრიორიტეტი შიდა სასოფლო გზების კეთილმოწყობაა. სამუშაოები კონკრეტულ მუნიციპალიტეტში არსებული ბიუჯეტის მიხედვით, ადგილობრივი მოსახლეობის უშუალო ჩართულობითა და ინტერესების გათვალისწინებით იგეგმება. კალენდარული წლის ნახევარზე მეტი გავიდა და, შესაბამისად, დაგეგმილი პროექტების უმრავლესობა უკვე დასრულებულია ან გეგმის მიხედვით მიმდინარეობს.

წელს რეგიონის ხუთივე მუნიციპალიტეტში 105-კილომეტრამდე ბეტონის გზა დაიგება, რაშიც 5,5-მდე მილიონი ლარი დაიხარჯება. აქედან, ქობულეთის მუნიციპალიტეტში დაიგება 28 კმ-ზე მეტი, ხელვაჩაურის მუნიციპალიტეტში – 23 კმ-მდე, ქედის მუნიციპალიტეტში – 23 კმ-მდე, შუახევის მუნიციპალიტეტში 18 კმ-ზე მეტი, ხულოს მუნიციპალიტეტში – 15 კმ-ზე მეტი.

დაგეგმილ პროექტებს აჭარის საავტომობილო გზებისა და სამელიორაციო სისტემების მართვის დეპარტამენტი ასრულებს. სამუშაოები საგზაო და სამელიორაციო ინფრასტრუქტურის მოვლა-შენახვის ქვეპროგრამის ფარგლებში ხორციელდება.

გთავაზობთ აჭარის მუნიციპალიტეტებში დასრულებული პროექტების ნაწილის ფოტო ისტორიას.