კრიმინალური პოლიციის ყოფილ თანამშრომელს, გაგა ბაუჟაძეს სასამართლომ 4 თვით პატიმრიბა შეუფარდა. 1 წლით და 8 თვით იგი პირობითი მსჯავრის ქვეშ იქნება.
გაგა ბაუჟაძემ რესტორან „საჭაშნიკესთან“, გორგილაძის ქუჩაზე, სამსახურებრივი პისტოლეტიდან ჰაერში ორჯერ გაისროლა. პოლიციელმა რესტორნიდან გამოსვლის შემდეგ გაისროლა. პოლიციას ქუჩაში მყოფმა მოქალაქეებმა მიაწოდეს ინფორმაცია ამის შესახებ.
შემთხვევიდან რამდენიმე დღეში კრიმინალური პოლიციის თანამშრომელი სამსახურიდან დაითხოვეს და ხულიგნობის მუხლით წაუყენეს ბრალი.
უკანონო გასროლის დროს, გაგა ბაუჟაძე სამსახურებრივ უფლებამოსილებას არ ასრულებდა.
„ამის მიუხედავად მას სამსახურებრივი იარაღის ტარების უფლება ჰქონდა,“ – აღნიშნავს ადვოკატი დავით საფარიძე.
ყოფილ პოლიციელს პროკურატურამ საპროცესო შეთანხმება გაუფორმა, ანუ მან ბრალი სრულად აღიარა. შეთანხმება დღეს, 28 ივნისს, მოსამართლე ვიოლეტა ფორჩხიძემ დაამტკიცა.
