ბათუმში, ევროპის მოედანზე, დაიწყო სოლიდარობის აქცია #ნუმომკლავ. აქცია დღეს მას შემდეგ დაიგეგმა, რაც თბილისში მოკლული დათუნა სარალიძის მამისთვის ცნობილი გახდა მისი შვილის მკვლელობის საქმეზე სასამართლოს გადაწყვეტილება და თბილისში დაიწყო სპონტანური აქცია.
ზაზა სარალიძემ დღეს მოქალაქეებს მოუწოდა, რომ გვერდში დაუდგნენ, რათა მკვლელობის მონაწილეები და მათი მფარველები კანონის შესაბამისად დაისაჯონ.
ბათუმში, ევროპის მოედანზე, შეკრებილი ადამიანები ამბობენ, რომ სარალიძის საქმე თანდათან ემსგავსება გირგვლიანის საქმეს.
თბილისში, ხორავას ქუჩაზე, მოკლული ლევან დადუნაშვილის მკვლელობის საქმეზე თბილისის საქალაქო სასამართლომ 31 მაისს გამამტყუნებელი განაჩენი გამოიტანა. რაც შეეხება იმავე ჩხუბის დროს მოკლულ დავით სარალიძეს, მისი მკვლელობის საქმეზე მოსამართლემ ბრალი მკვლელობიდან მკვლელობის მცდელობაზე გადააკვალიფიცირა. შესაბამისად, ამ დროისათვის უცნობია, ვინ მოკლა არასრულწლოვანი დავით სარალიძე.
