ქალაქის ბიუჯეტიდან მიმდინარე წლის 26 მაისს დაგეგმილი ღონისძიებებისთვის 80 ათასი ლარი დაიხარჯება. აქედან უშუალოდ ღონისძიების ორგანიზებისთვის – 56 980 ლარი, ხოლო გასართობი მომსახურებისთვის – 23 020 ლარია გათვალისწინებული. შესაბამის მომსახურებას ბათუმის კულტურის ცენტრი გამარტივებული წესით, ტენდერის გარეშე შეისყიდის.
კულტურის ცენტრის ინფორმაციით, წინასწარი თანხმობა მიღებულია და ღონისძიებაში მონაწილეობას მიიღებენ: არჩილ გოგიტიძე, ანიკო ბერიძე, გიორგი ბერიძე, ავთო აბესლამიძე, გიორგი ნაკაშიძე, გიორგი ფუტკარაძე, სალომე კალანდაძე, სულხან დევაძე და სოფო ხალვაში.
ასევე ჯგუფები: sound lab-ი, 4 secons-ი, „ნერვოზი“, „ლილე“.
კულტურის ცენტრში „ბათუმელებს“ უთხრეს, რომ 26 მაისს დაგეგმილი სხვადასხვა ღონისძიების გრაფიკის დეტალები ზუსტდება.
ღონისძიებები ბათუმის ბულვარში, ანბანის კოშკის მიმდებარე ტერიტორიაზე გაიმართება.
საქართველოს თავდაცვის სამინისტროს ინფორმაციით, აქვე გაიმართება შეიარაღებისა და ჯავშანტექნიკის გამოფენაც.
„საქართველოს დამოკიდებლობის 100 წლისთავის აღნიშვნა, რომელიც განსაკუთრებული პოლიტიკურ-საზოგადეობრივი მნიშვნელობისაა, წელს დაიგეგმა საქართველოს მთავრობის მიერ ცენტრალიზებული წესით. გამომდინარე აქედან, „ბათუმის კულტურის ცენტრი“ მთლიანად დამოკიდებული იყო შესაბამისი გადაწყვეტილების მიღებაზე. აღნიშნულ ღონისძიებასთან დაკავშირებით განსახორციელებელი აქტივობების ნუსხა განისაზღვრა საქართველოს მთავრობის მიერ, რის გამოც შეუძლებელი იყო შესყიდვების წინასწარი განსაზღვრა,“ – აღნიშნულია კულტურის ცენტრის მიერ შესყიდვების სააგენტოში გაგზავნილ წერილში.
სახელმწიფო შესყიდვების სააგენტომ კულტურის ცენტრს თანხმობა, 80 ათასი ლარის ტენდერის გარეშე გახარჯვაზე, გუშინ, 17 მაისს, მისცა.
________________________________
