ბათუმში, ახალი სპორტული კომპლექსის მიმდებარედ, სადაც მსოფლიო საჭადრაკო ოლიმპიადა უნდა ჩატარდეს, ქალაქის მერია ავტოსადგომის მოწყობას გეგმავს, რისთვისაც 1 701 126 ლარია გამოყოფილი. შესაბამისი ტენდერი 11 მაისს დასრულდება, ავტოსადგომი კი, პირველ სექტემბრამდე უნდა მოეწყოს.
ავტოსადგომი სელიმ ხიმშიაშვილის, ორბელიანისა და ვახტანგ შამილაძის ქუჩებს შორის 5 800 კვ/მ ტერიტორიაზე მოეწყობა. ამ სამ ქუჩასა და ლადო ასათიანის ქუჩებს შორის არსებულ ტერიტორიაზე მსოფლიო საჭადრაკო ოლიმპიადისთვის ახალი სპორტული კომპლექსი უკვე აშენდა, ასევე შენდება ნაგებობა ყინულის სასახლის ნაცვლად, რომელიც, როგორც აჭარის მთავრობაში ამბობენ, ოლიმპიადის დასრულების შემდეგ ყინულის არენად გადაკეთდება.
ბათუმის სპორტული კომპლექსისა და მიმდებარე ტერიტორიის ესკიზი /ლადო ასათიანის, სელიმ ხიმშიაშვილის, სულხან-საბა ორბელიანისა და ვახტანგ შამილაძის ქუჩებს შორის არსებული ტერიტორია
ბათუმის ბიუჯეტიდან ცალკე – 1 მილიონ 144 ათას 72 ლარი, გამარტივებული შესყიდვით, ანუ ტენდერის გარეშე დაიხარჯება სპორტული კომპლექსის ენერგომომარაგების, გაზის, წყლის სისტემისა და კანალიზაციის დაერთებისთვის.
ბათუმის მერია ორი ქუჩის კეთილმოწყობასაც გეგმავს, რომლებიც ყინულის სასახლესა და სპორტკომპლექსს ესაზღვრება, რისთვისაც 3 მილიონ 934 ათას 739 ლარი აქვს გათვალისწინებული. საუბარია ლადო ასათიანისა და ვახტანგ შამილაძის ქუჩებზე.
ამავე თემაზე:
https://batumelebi.netgazeti.ge/news/118245/
https://batumelebi.netgazeti.ge/news/110691/
https://batumelebi.netgazeti.ge/news/130071/
https://batumelebi.netgazeti.ge/news/115642/
