ბათუმის სანაპირო ზოლში – მწვანე კონცხიდან გონიო-კვარიათის ჩათვლით პლაჟებზე – საპლაჟო ინფრასტრუქტურის, ასევე გართობისა და კვების ობიექტების მოსაწყობად აუქციონებს ბათუმის მერია და „ბათუმის ბულვარი“ [ბულვარის გასწვრივ პლაჟზე] აცხადებს. პლაჟები იყოფა სექტორებად და გაიცემა გარკვეული დროით იჯარით, პირობიანი აუქციონის წესით. აუქციონში მონაწილეობა კი კონკრეტული ნაკვეთის როგორც ყოფილ მოიჯარეს, ასევე ნებისმიერ დაინტერესებულ პირს შეუძლია.
ბათუმის მერია მიმდინარე წელს აუქციონებს გამოაცხადებს მახინჯაურისა და გონიო-კვარიათის პლაჟებზე.
„ამ ეტაპზე მიმდინარეობს ტერიტორიების დაგეგმარება, სექტორებად დაყოფა, რაზედაც ქალაქის არქიტექტურის სამსახური უკვე მუშაობს. დაგეგმარება დაახლოებით 10 დღეში დასრულდება და აუქციონები ამის შემდეგ სექტორების მიხედვით, ეტაპობრივად გამოცხადდება,“ – განაცხადეს ბათუმის მერიაში.
„ბათუმის ბულვარმა“ კი ტურისტულ სეზონთან დაკავშირებით, ბულვარში სხვადასხვა სახის სამეწარმეო საქმიანობის განსახორციელებლად ელექტრონული აუქციონების გამოცხადება 16 აპრილს დაიწყო.
რაც შეეხება უშუალოდ პლაჟს, როგორც ბულვარის ადმინისტრაციაში გვითხრეს, საპლაჟო ინფრასტრუქტურის განსათავსებლად ფაქტობრივად მთელი პლაჟი [სექტორების მიხედვით] სამწლიანი იჯარით 2017 წელს გაიცა.
„დარჩენილია პლაჟის მონაკვეთი ანბანის კოშკის მიმდებარედ, სადაც საპლაჟო ინფრასტრუქტურის განთავსებაზე აუქციონებს მიმდინარე წლის მაისის დასაწყისში გამოვაცხადებთ,“ – გვითხრეს ბულვარის ადმინისტრაციაში.
ამავე თემაზე:
https://batumelebi.netgazeti.ge/news/128239/
https://batumelebi.netgazeti.ge/news/83129/
