ბათუმში, ახმეტელის ქ. N1-3-5 საცხოვრებელი სახლებისა და ილია ჭავჭავაძის სახელობის სახელმწიფო დრამატული თეატრის მიმდებარედ არსებულ სკვერში ქალაქის მერია გაზონებს დეკორატიული ღობით შეღობავს. სკვერის დეკორატიული ღობით მოწყობის სამუშაოებისთვის ბათუმის მერიას 18 ათამდე ლარი აქვს გამოყოფილი.
ახმეტელის ქუჩაზე საცხოვრებელი კორპუსებისა და დრამატული თეატრის მიმდებარე სკვერში გამწვანების ზოლების გასწვრივ მოეწყობა ლითონის დეკორატიული ღობე, სიმაღლით 40სმ, შესასვლელებში კი დაყენდება ბოძკინტები.
მერიის ინფორმაციით, ბოძკინტები 2 ტიპის – დემონტირებადი და სტაციონალური იქნება. დემონტირებადი ბოძკინტები მოეწყობა იმ ადგილებში, სადაც საჭიროების შემთხვევაში შესაძლებელი იქნება სპეცავტომობილების შეყვანა.
სატენდერო პირობის მიხედვით, სამუშაოების მიმდინარეობის პროცესში, მერიის მხრიდან ტექნიკურ ზედამხედველსა და მიმწოდებელს შორის შესაძლებელია დაზუსტდეს სამუშაოების შესრულების გეგმა-გრაფიკი, რაც არ გამოიწვევს ხელშეკრულებაში დამატებით ცვლილებას, გარდა სამუშაოების დასრულების ვადისა. ყველა სახის მოსამზადებელი სამუშაოების დაწყება შეთანხმებული უნდა იყოს მერიის კეთილმოწყობის სამსახურთან.
ტენდერში წინადადებების მიღება 2018 წლის 30 აპრილს დაიწყება და 2 მაისს დასრულდება. გამარჯვებულთან ხელშეკრულების გაფორმებიდან 60 დღეში კი სამუშაოები უნდა დასრულდეს.
სკვერი ბათუმის დრამატულ თეატრთან და ღობის ესკიზი
