23 მარტს, 15:00 საათზე, სარფის საბაჟო-გამსვლელ პუნქტში დაგეგმილია მიგრანტი მოსახლეობის შემოწმება აივ/შიდსა და ტუბერკულოზზე.
პროექტი დაახლოებით 15 დღეს გაგრძელდება, რომლის ფარგლებში შემოწმება ვირუსებზე ნებაყოფლობითია.
პროექტის მიზანია, სამხრეთ კავკასიის რეგიონის მიგრანტ და მობილურ მოსახლეობაში აივ ინფექციის/შიდსისა და ტუბერკულოზის პრევენცია, დაავადებების დროული გამოვლენა და შემდეგ გადამისამართება. აჭარის საზოგადოებრივი ჯანდაცვის დირექტორი, ნინო ნიჟარაძე განმარტავს, რომ პროექტი ასევე მიზნად ისახავს ამ დაავადებათა გავრცელების შესწავლას.
„იგეგმება ტუბერკულოზზე ინტერვიუს ჩატარება, აივ/შიდსზე სწრაფი-მარტივი ტესტირება და ასევე, სურვილის შემთხვევაში C ჰეპატიტზეც სწრაფი-მარტივი ტესტირება. ეს ჩატარდება საზღვარზე როგრც გადამსვლელ, ისე შემომსვლელ მიგრანტ მოსახლეობაში,“ – ამბობს ნინო ნიჟარაძე.
პროექტს ახორციელებენ დაავადებათა კონტროლისa და საზოგადოებრივი ჯანმრთელობის ეროვნული ცენტრი და მიგრაციის საერთაშორისო ორგანიზაცა.
პროექტი „აივ/შიდსის და ტუბერკულოზის პრევენციის, გამოვლენისა და მკურნალობის მექანიზმების გაძლიერება მიგრანტ და მობილურ მოსახლეობაში სამხრეთ კავკასიის ქვეყნებში“ მუშაობს სომხეთში, აზერბაიჯანში, საქართველოში კი პირველად ხორციელდება.
